УКАЗ, КАКО ПОДОБАЕТ ГЛАГОЛАТИ ОТПУСТЫ ВО

УКАЗ, КАКО ПОДОБАЕТ ГЛАГОЛАТИ ОТПУСТЫ ВО ВЛАДЫЧНИ ПРАЗДНИКИ, И БОГОМАТЕРЕ, И ВО ВСЕ ЛЕТО. ВЕДОМО ЖЕ ДА БУДЕТ ТЕБЕ О СЕМ, ИЕРЕЮ: ЕГДА ОТПУСТ ГЛАГОЛЕШИ ДНЕВНЫЙ, ИЛИ НА ПРАЗДНИК БОГОРОДИЦЫ, ДА НЕ ИМАШИ ГЛАГОЛАТИ В НЕМ: ХРИСТОС ИСТИННЫЙ БОГ НАШ, МОЛИТВАМИ ПРЕЧИСТЫЯ СВОЕЯ МАТЕРЕ, ЧЕСТНАГО И СЛАВНАГО ЕЯ РОЖДЕСТВА, ИЛИ УСПЕНИЯ, ИЛИ ВВЕДЕНИЯ, И ИНЫХ ПРАЗДНИКОВ ЕЯ: ИЛИ СВЯТАГО ИОАННА ПРЕДТЕЧИ РОЖДЕСТВА, ИЛИ УСЕКНОВЕНИЯ, И ПРОЧИХ СВЯТЫХ ПАМЯТИ ИЛИ ПРЕСТАВЛЕНИЯ ИХ, ИЛИ ОБРЕТЕНИЯ, И ПРЕНЕСЕНИЯ МОЩЕЙ. НО СИЦЕ ГЛАГОЛИ, АЩЕ ПРАЗДНИК БОГОРОДИЦЫ, РОЖДЕСТВА ЕЯ ИЛИ УСПЕНИЯ, И ПРОЧИХ: ХРИСТОС ИСТИННЫЙ БОГ НАШ, МОЛИТВАМИ ПРЕЧИСТЫЯ СВОЕЯ МАТЕРЕ, И ВСЕХ СВЯТЫХ, ПОМИЛУЕТ И СПАСЕТ НАС, ЯКО БЛАГ И ЧЕЛОВЕКОЛЮБЕЦ. АЩЕ ЖЕ СВЯТАГО: ХРИСТОС ИСТИННЫЙ БОГ НАШ, МОЛИТВАМИ ПРЕЧИСТЫЯ СВОЕЯ МАТЕРЕ, И СВЯТАГО АПОСТОЛА, [ИЛИ СВЯТИТЕЛЯ, ИЛИ МУЧЕНИКА,] ИМЯРЕК, И ВСЕХ СВЯТЫХ: И ПРОЧЕЕ ДО КОНЦА. ПОНЕЖЕ НЕ РОЖДЕСТВО БОГОРОДИЦЫ, НИЖЕ ВВЕДЕНИЕ, ИЛИ УСПЕНИЕ ЕЯ, ПОДВИЗАЕМ К БОГУ НА МОЛИТВУ, НО САМУЮ ПРЕСВЯТУЮ БОГОРОДИЦУ: ТАКОЖДЕ, НИ ПАМЯТИ, ИЛИ ПРЕСТАВЛЕНИЯ СВЯТЫХ ПРИВОДИМ НА МОЛИТВУ К БОГУ, НО САМЕХ ИХ. ОТПУСТЫ ВЛАДЫЧНИХ ПРАЗДНИКОВ ГЛАГОЛЕМИИ В ВЕЧЕРНЮ, ВО УТРЕНЮ, И В ЛИТУРГИЮ ПО ЧИНУ. НА РОЖДЕСТВО ХРИСТОВО: ИЖЕ В ВЕРТЕПЕ РОДИВЫЙСЯ, И В ЯСЛЕХ ВОЗЛЕГИЙ, НАШЕГО РАДИ СПАСЕНИЯ, ХРИСТОС ИСТИННЫЙ БОГ НАШ: И ПРОЧЕЕ ДО КОНЦА. НА ОБРЕЗАНИЕ: ИЖЕ ВО ОСМЫЙ ДЕНЬ ПЛОТИЮ ОБРЕЗАТИСЯ ИЗВОЛИВЫЙ, НАШЕГО РАДИ СПАСЕНИЯ, ХРИСТОС ИСТИННЫЙ: НА БОГОЯВЛЕНИЕ: ИЖЕ ВО ИОРДАНЕ КРЕСТИТИСЯ ИЗВОЛИВЫЙ ОТ ИОАННА, НАШЕГО РАДИ СПАСЕНИЯ, ХРИСТОС ИСТИННЫЙ: НА СРЕТЕНИЕ: ИЖЕ ВО ОБЪЯТИИХ ПРАВЕДНАГО СИМЕОНА НОСИТИСЯ ИЗВОЛИВЫЙ, НАШЕГО РАДИ СПАСЕНИЯ, ХРИСТОС ИСТИННЫЙ: НА ПРЕОБРАЖЕНИЕ: ИЖЕ НА ГОРЕ ФАВОРСТЕЙ ПРЕОБРАЗИВЫЙСЯ ВО СЛАВЕ, ПРЕД СВЯТЫМИ СВОИМИ УЧЕНИКИ И АПОСТОЛЫ, ХРИСТОС ИСТИННЫЙ: В НЕДЕЛЮ ЦВЕТНУЮ: ИЖЕ НА ЖРЕБЯТИ ОСЛИ СЕСТИ ИЗВОЛИВЫЙ, НАШЕГО РАДИ СПАСЕНИЯ, ХРИСТОС ИСТИННЫЙ: В ТУ ЖЕ НЕДЕЛЮ ВЕЧЕРА: ГРЯДЫЙ ГОСПОДЬ НА ВОЛЬНУЮ СТРАСТЬ, НАШЕГО РАДИ СПАСЕНИЯ, ХРИСТОС ИСТИННЫЙ: В ВЕЛИКИЙ ЧЕТВЕРТОК: ИЖЕ ЗА ПРЕВОСХОДЯЩУЮ БЛАГОСТЬ ПУТЬ ДОБРЕЙШИЙ СМИРЕНИЯ ПОКАЗАВЫЙ, ВНЕГДА УМЫТИ НОГИ УЧЕНИКОВ, ДАЖЕ И ДО КРЕСТА И ПОГРЕБЕНИЯ СНИЗШЕДЫЙ НАМ, ХРИСТОС ИСТИННЫЙ: ВО ОТПУСТ СВЯТЫХ СТРАСТЕЙ: ИЖЕ ОПЛЕВАНИЯ, И БИЕНИЯ, И ЗАУШЕНИЯ, И КРЕСТ, И СМЕРТЬ ПРЕТЕРПЕВЫЙ ЗА СПАСЕНИЕ МИРА, ХРИСТОС ИСТИННЫЙ: ВО СВЯТЫЙ И ВЕЛИКИЙ ПЯТОК: ИЖЕ НАС РАДИ ЧЕЛОВЕКОВ И НАШЕГО РАДИ СПАСЕНИЯ СТРАШНЫЯ СТРАСТИ И ЖИВОТВОРЯЩИЙ КРЕСТ, И ВОЛЬНОЕ ПОГРЕБЕНИЕ ПЛОТИЮ ИЗВОЛИВЫЙ, ХРИСТОС ИСТИННЫЙ: В НЕДЕЛЮ ПАСХИ, И ВО ВСЮ СВЕТЛУЮ СЕДМИЦУ: ХРИСТОС ВОСКРЕСЫЙ ИЗ МЕРТВЫХ, СМЕРТИЮ СМЕРТЬ ПОПРАВЫЙ, И СУЩИМ ВО ГРОБЕХ ЖИВОТ ДАРОВАВЫЙ, ИСТИННЫЙ БОГ НАШ: НА ВОЗНЕСЕНИЕ: ИЖЕ ВО СЛАВЕ ВОЗНЕСЫЙСЯ ОТ НАС НА НЕБО, И ОДЕСНУЮ СЕДЫЙ БОГА И ОТЦА, ХРИСТОС ИСТИННЫЙ: В НЕДЕЛЮ ПЯТДЕСЯТНУЮ: ИЖЕ В ВИДЕНИИ ОГНЕННЫХ ЯЗЫК С НЕБЕСЕ НИЗПОСЛАВЫЙ ПРЕСВЯТАГО ДУХА, НА СВЯТЫЯ СВОЯ УЧЕНИКИ И АПОСТОЛЫ, ХРИСТОС ИСТИННЫЙ: В ТУ ЖЕ НЕДЕЛЮ ВЕЧЕРА: ИЖЕ ОТ ОТЧИХ И БОЖЕСТВЕННЫХ НЕДР ИСТОЩИВЫЙ СЕБЕ, И С НЕБЕСЕ НА ЗЕМЛЮ СОШЕДЫЙ, И НАШЕ ВСЕ ВОСПРИЕМЫЙ ЕСТЕСТВО, И ОБОЖИВЫЙ Е, ПО СИХ ЖЕ НА НЕБЕСА ПАКИ ВОЗШЕДЫЙ, И ОДЕСНУЮ СЕДЫЙ БОГА И ОТЦА, БОЖЕСТВЕННАГО ЖЕ И СВЯТАГО, И ЕДИНОСУЩНАГО, И ЕДИНОСИЛЬНАГО, И ЕДИНОСЛАВНАГО, И СОПРИСНОСУЩНАГО ДУХА НИЗПОСЛАВЫЙ НА СВЯТЫЯ СВОЯ УЧЕНИКИ И АПОСТОЛЫ, И СИМ ПРОСВЕТИВЫЙ УБО ИХ, ТЕМИ ЖЕ ВСЮ ВСЕЛЕННУЮ, ХРИСТОС ИСТИННЫЙ БОГ НАШ, МОЛИТВАМИ ПРЕЧИСТЫЯ И ПРЕНЕПОРОЧНЫЯ СВЯТЫЯ СВОЕЯ МАТЕРЕ, СВЯТЫХ СЛАВНЫХ, ПРЕХВАЛЬНЫХ БОГОПРОПОВЕДНИКОВ И ДУХОНОСНЫХ АПОСТОЛОВ, И ВСЕХ СВЯТЫХ, ПОМИЛУЕТ И СПАСЕТ НАС, ЯКО БЛАГ И ЧЕЛОВЕКОЛЮБЕЦ. ОТПУСТЫ ДНЕВНИИ ВО ВСЮ СЕДМИЦУ, ПО ОБЫЧАЮ СВЯТЫЯ ВОСТОЧНЫЯ ЦЕРКВЕ. В СУББОТУ ВЕЧЕРА: ХРИСТОС ИСТИННЫЙ БОГ НАШ, МОЛИТВАМИ ПРЕЧИСТЫЯ СВОЕЯ МАТЕРЕ, СВЯТЫХ СЛАВНЫХ И ВСЕХВАЛЬНЫХ АПОСТОЛ: [И СВЯТАГО, ЕГОЖЕ ЕСТЬ ХРАМ, И СВЯТАГО, ЕГОЖЕ ЕСТЬ ДЕНЬ:] СВЯТЫХ ПРАВЕДНЫХ БОГООТЦ ИОАКИМА И АННЫ, И ВСЕХ СВЯТЫХ, ПОМИЛУЕТ И СПАСЕТ НАС, ЯКО БЛАГ И ЧЕЛОВЕКОЛЮБЕЦ. В НЕДЕЛЮ УТРЕНИ: ВОСКРЕСЫЙ ИЗ МЕРТВЫХ ХРИСТОС ИСТИННЫЙ БОГ НАШ, МОЛИТВАМИ ПРЕЧИСТЫЯ СВОЕЯ МАТЕРЕ, СВЯТЫХ СЛАВНЫХ И ВСЕХВАЛЬНЫХ АПОСТОЛ: И ПРОЧАЯ, ЯКОЖЕ ВЫШЕ ПИСАНО. ВО СВЯТЕЙ ЛИТУРГИИ ОТПУСТ ТОЙЖЕ, ЯКОЖЕ И НА УТРЕНИ, ПРИГЛАШАЕТ ЖЕ И СВЯТАГО, ЕГО БЫВАЕТ ЛИТУРГИА, ЗЛАТОУСТАГО, И ВАСИЛИА ВЕЛИКАГО. В НЕДЕЛЮ ВЕЧЕРА, И В ПОНЕДЕЛЬНИК НА УТРЕНИ: ХРИСТОС ИСТИННЫЙ БОГ НАШ, МОЛИТВАМИ ПРЕЧИСТЫЯ СВОЕЯ МАТЕРЕ, ПРЕДСТАТЕЛЬСТВЫ ЧЕСТНЫХ НЕБЕСНЫХ СИЛ БЕЗПЛОТНЫХ: СВЯТЫХ СЛАВНЫХ И ВСЕХВАЛЬНЫХ АПОСТОЛ, [И СВЯТЫХ ХРАМА, И ДНЕ:] И СВЯТЫХ ПРАВЕДНЫХ БОГООТЦ ИОАКИМА И АННЫ, И ВСЕХ СВЯТЫХ, ПОМИЛУЕТ И СПАСЕТ НАС, ЯКО БЛАГ И ЧЕЛОВЕКОЛЮБЕЦ. В ПОНЕДЕЛЬНИК ВЕЧЕРА, И ВО ВТОРНИК НА УТРЕНИ: ХРИСТОС ИСТИННЫЙ БОГ НАШ, МОЛИТВАМИ ПРЕЧИСТЫЯ СВОЕЯ МАТЕРЕ, ЧЕСТНАГО СЛАВНАГО ПРОРОКА, ПРЕДТЕЧИ И КРЕСТИТЕЛЯ ИОАННА, СВЯТЫХ СЛАВНЫХ И ВСЕХВАЛЬНЫХ АПОСТОЛ: И ПРОЧАЯ. ВО ВТОРНИК ВЕЧЕРА, И В СРЕДУ НА УТРЕНИ: ХРИСТОС ИСТИННЫЙ БОГ НАШ, МОЛИТВАМИ ПРЕЧИСТЫЯ СВОЕЯ МАТЕРЕ, СИЛОЮ ЧЕСТНАГО И ЖИВОТВОРЯЩАГО КРЕСТА, СВЯТЫХ СЛАВНЫХ И ВСЕХВАЛЬНЫХ АПОСТОЛ: И ПРОЧАЯ. В СРЕДУ ВЕЧЕРА, И В ЧЕТВЕРТОК НА УТРЕНИ: ХРИСТОС ИСТИННЫЙ БОГ НАШ, МОЛИТВАМИ ПРЕЧИСТЫЯ СВОЕЯ МАТЕРЕ, СВЯТЫХ СЛАВНЫХ И ВСЕХВАЛЬНЫХ АПОСТОЛ, ИЖЕ ВО СВЯТЫХ ОТЦА НАШЕГО НИКОЛАА АРХИЕПИСКОПА, МИРЛИКИЙСКАГО ЧУДОТВОРЦА: И ПРОЧАЯ. В ЧЕТВЕРТОК ВЕЧЕРА, И В ПЯТОК НА УТРЕНИ: ХРИСТОС ИСТИННЫЙ БОГ НАШ, МОЛИТВАМИ ПРЕЧИСТЫЯ СВОЕЯ МАТЕРЕ, СИЛОЮ ЧЕСТНАГО И ЖИВОТВОРЯЩАГО КРЕСТА, СВЯТЫХ СЛАВНЫХ И ВСЕХВАЛЬНЫХ АПОСТОЛ: И ПРОЧАЯ. В ПЯТОК ВЕЧЕРА, И В СУББОТУ НА УТРЕНИ: ХРИСТОС ИСТИННЫЙ БОГ НАШ, МОЛИТВАМИ ПРЕЧИСТЫЯ СВОЕЯ МАТЕРЕ, СВЯТЫХ СЛАВНЫХ И ВСЕХВАЛЬНЫХ АПОСТОЛ, СВЯТЫХ СЛАВНЫХ И ДОБРОПОБЕДНЫХ МУЧЕНИКОВ, ПРЕПОДОБНЫХ И БОГОНОСНЫХ ОТЕЦ НАШИХ, [И СВЯТАГО ХРАМА И ДНЕ,] СВЯТЫХ ПРАВЕДНЫХ БОГООТЦ ИОАКИМА И АННЫ, И ВСЕХ СВЯТЫХ, ПОМИЛУЕТ И СПАСЕТ НАС, ЯКО БЛАГ И ЧЕЛОВЕКОЛЮБЕЦ. А ВО ВСЮ СЕДМИЦУ НА СВЯТЕЙ ЛИТУРГИИ БЫВАЮТ ОТПУСТЫ, ЯКОЖЕ ПРЕДПИСАСЯ, НА ВЕЧЕРНИ И НА УТРЕНИ ПО ДНЕХ: ТОЧИЮ ПРИЛАГАЕТСЯ И СВЯТАГО ИМЯ, ЕГОЖЕ ЕСТЬ ЛИТУРГИА, СИЦЕ: ИЖЕ ВО СВЯТЫХ ОТЦА НАШЕГО ИОАННА, АРХИЕПИСКПА КОНСТАНТИНЯ ГРАДА, ЗЛАТОУСТАГО [ИЛИ ВЕЛИКАГО ВАСИЛИА, ИЛИ ГРИГОРИА ДВОЕСЛОВА.] А В ПОВЕЧЕРИИ, И В ПОЛУНОЩНИЦЕ, И В ЧАСЕХ, МАЛЫЙ ОТПУСТ БЫВАЕТ ВО ВСЕЙ СЕДМИЦЕ, СИЦЕ: ХРИСТОС ИСТИННЫЙ БОГ НАШ, МОЛИТВАМИ ПРЕЧИСТЫЯ СВОЕЯ МАТЕРЕ, ПРЕПОДОБНЫХ И БОГОНОСНЫХ ОТЕЦ НАШИХ, И ВСЕХ СВЯТЫХ, ПОМИЛУЕТ И СПАСЕТ НАС, ЯКО БЛАГ И ЧЕЛОВЕКОЛЮБЕЦ. ТОЧИЮ В НЕДЕЛЮ НА ПОЛУНОЩНИЦЕ И В ЧАСЕХ ПРИЛАГАЕТСЯ В НАЧАЛЕ: ВОСКРЕСЫЙ ИЗ МЕРТВЫХ: В ПЯТОК ВЕЧЕРА, И В СУББОТУ НА УТРЕНИ, И НА ЛИТУРГИИ, НЕ ПОДОБАЕТ ВОЗГЛАШАТИ НА ОТПУСТЕ: СИЛОЮ ЧЕСТНАГО И ЖИВОТВОРЯЩАГО КРЕСТА: ЗАНЕ В ТОЙ ДЕНЬ КРЕСТУ СЛУЖБЫ НИКАКИЯ НЕСТЬ. В КОТОРЫЙ БО ДЕНЬ ВОСПОМИНАНИЕ И СЛУЖБА ЧЕСТНАГО КРЕСТА БЫВАЕТ, ТОГДА И ПОСТ ЕСТЬ: ЯКОЖЕ В СРЕДЕ И В ПЯТЦЕ, И В ВОЗДВИЖЕНИЕ ЧЕСТНАГО КРЕСТА, ПОДОБНЕ И В НЕДЕЛЮ ВО ОТПУСТЕ, КРЕСТА НЕ ВОСПОМИНАЕТСЯ, ЗАНЕ НЕ ПОСТНЫЙ ДЕНЬ ЕСТЬ: СИЦЕ ДЕРЖИТ ЧИН И ОБЫЧАЙ СВЯТАЯ ВОСТОЧНАЯ ЦЕРКОВЬ, ВО ВСЕХ ПАТРИАРХИАХ, И СВЯТЫХ ОБИТЕЛЕХ, И ПОВСЮДУ. ВЕДОМО БУДИ И О СЕМ: ЯКО ИДЕЖЕ ЕСТЬ ХРАМ СПАСА ХРИСТА, РОЖДЕСТВО, ИЛИ БОГОЯВЛЕНИЕ, ИЛИ ВОЗНЕСЕНИЕ, И ПРОЧАЯ, В СЕДМИЧНОМ ОТПУСТЕ НЕ ВОЗГЛАШАЮТСЯ НИКОГДА ПРАЗДНИЧНЫЯ ОТПУСТЫ, ТОЧИЮ ВОЗГЛАШАЕТСЯ ПРАЗДНИЧНЫЙ ОТПУСТ В ДЕНЬ ПРАЗДНИКА, И ДО ОТДАНИЯ: А ВО ВЕСЬ ГОД ТОКМО, ХРИСТОС ИСТИННЫЙ БОГ НАШ: И ПРОЧАЯ ПО ДНЮ.