ПОВЕЧЕ́РИЕ ЖЕ ГЛАГО́ЛЕМ МА́ЛОЕ,

ПОВЕЧЕ́РИЕ ЖЕ ГЛАГО́ЛЕМ МА́ЛОЕ, НА НЕ́МЖЕ ПОЕ́М ТРИПЕ́СНЕЦ ГОСПОДИ́НА АНДРЕ́А ВЕЛИ́КАГО ЧЕТВЕРТКА́. ГЛА́С 6. ПЕ́СНЬ 4. ИРМО́С: УСЛЫ́ША ПРОРО́К ПРИШЕ́СТВИЕ ТВОЕ́ ГО́СПОДИ, И УБОЯ́СЯ, Я́КО ХО́ЩЕШИ ОТ ДЕ́ВЫ РОДИ́ТИСЯ, И ЧЕЛОВЕ́КОМ ЯВИ́ТИСЯ, И ГЛАГО́ЛАШЕ: УСЛЫ́ШАХ СЛУ́Х ТВО́Й, И УБОЯ́ХСЯ, СЛА́ВА СИ́ЛЕ ТВОЕ́Й ГО́СПОДИ. ГО́РНИЦА ПО́СТЛАНАЯ, ПРИЯ́Т ТЯ́ СОЗДА́ТЕЛЯ И СЪТАИ́ННИКИ, И ТА́МО ПА́СХУ СКОНЧА́Л ЕСИ́, И ТА́МО СОДЕ́ЛАЛ ЕСИ́ ТАИНСТВА: ТА́МО БО ДВЕМА́ ПО́СЛАНОМА НЫ́НЕ УЧЕНИКО́МА ТВОИ́МА, ПА́СХА УГОТО́ВАСЯ ТЕБЕ́. ИДИ́ТЕ КО О́НСИЦЕ, ВСЯ ВЕ́ДЫЙ ПРЕДГЛАГО́ЛЕТ АПО́СТОЛОМ, И БЛА́ЖЕ́Н Е́СТЬ, И́ЖЕ МО́ЖЕТ ВЕ́РНО ПРИЯ́ТИ ГО́СПОДА: ГО́РНИЦУ У́БО СЕ́РДЦЕ ПРЕДУГОТО́ВАВ, И ВЕ́ЧЕРЮ БЛА́ГОЧЕ́СТИЕ. НРА́В СРЕБРОЛЮ́БИЯ, И О́БРАЗ ТВО́Й БЕЗУ́МИЯ ИСПО́ЛНЬ НЕСМЫ́СЛЕННЫЙ ИУ́ДО: ВВЕ́РЕН БО БЫ́В ЕДИ́Н ТО́КМО КОВЧЕ́ЖЦУ, ВСЯ́КО НЕ ПРЕКЛОНИ́ЛСЯ ЕСИ́ К МИЛОСЕ́РДИЮ: НО ЗАКЛЮЧИ́Л ЕСИ́ ЖЕСТО́КАГО ТВОЕГО́ СЕ́РДЦА УТРО́БУ, ПРЕДА́В ЕДИ́НАГО БЛА́ГОУТРО́БНАГО. НРА́В БОГОУБИ́ЙЦ ПРОДА́НИЮ СРЕБРОЛЮ́БЦА СМЕСИ́ВЫЙСЯ: О́В У́БО КО УБИЕ́НИЮ ВООРУЖИ́ВСЯ, О́В ЖЕ К СРЕ́БРЕНИКОМ УСТРЕМЛЯ́ШЕСЯ: УДАВЛЕ́НИЕМ БО ТОГДА́ ПРЕДРАЗСУДИ́В ПОКАЯ́НИЕ ЗЛЕ́, Е́ЖЕ ЖИ́ТИ ЛИШИ́СЯ. ЛОБЫЗА́НИЕ ИСПО́ЛНЕНО ЛЬСТИ́, Е́ЖЕ РА́ДУЙСЯ, СО ОРУ́ЖИЕМ, ЛЬСТИ́ВЫЙ ИУ́ДО: ЯЗЫ́КОМ У́БО ПРОВЕЩАВА́ЕШИ Я́ЖЕ К СОЕДИНЕ́НИЮ, НРА́ВОМ ЖЕ ПОМАВА́ЕШИ К РАЗСТОЯ́НИЮ: ПРЕДА́ТИ БО БЕЗЗАКО́ННИКОМ БЛА́ГОДЕ́ТЕЛЯ ЛЕ́СТНЕ ПОУЧИ́ЛСЯ ЕСИ́. ЛОБЫЗА́ЕШИ И ПРОДАЕ́ШИ ИУ́ДО, ЦЕЛУ́ЕШИ И НЕ СТЫДИ́ШИСЯ, ЛЕ́СТИЮ ПРИТЕКИ́Й. КТО́ НЕНАВИ́ДЯ ЛОБЫЗА́ЕТ ТРЕОКАЯ́ННЕ? КТО́ ЛЮБЯ́ ПРОДАЕ́Т НА ЦЕНЕ́? ЛОБЫЗА́НИЕ ТВОЕГО́ БЕЗСТУ́ДНАГО ЗЛОСОВЕ́ТИЯ ОБЛИЧА́ЕТ ПРОИЗВОЛЕ́НИЕ. СЛА́ВА: НЕРАЗДЕ́ЛЬНОЕ СУЩЕСТВО́М, НЕСЛИ́ТНОЕ ЛИ́ЦЫ, БОГОСЛО́ВЛЮ ТЯ́, ТРО́ИЧЕСКОЕ ЕДИ́НО БО́ЖЕСТВО́, Я́КО ЕДИНОЦА́РСТВЕННОЕ И СОПРЕСТО́ЛЬНОЕ, ВОПИЮ́ ТЕБЕ́ ПЕ́СНЬ ВЕЛИ́КУЮ, В ВЫ́ШНИХ ТРЕГУ́БО ПЕСНОСЛО́ВИМУЮ. И НЫ́НЕ, БОГОРО́ДИЧЕН: ЗАЧА́ТИЕ ПА́ЧЕ СЛО́ВА, РОЖДЕ́СТВО́ ТВОЕ́ ПА́ЧЕ ЕСТЕСТВА́ БОГОРОДИ́ТЕЛЬНИЦЕ: О́ВО У́БО ОТ ДУ́ХА БЕЗ СЕ́МЕНЕ, О́ВО ЖЕ ЗАКО́НОВ ЕСТЕСТВА́ ТАЯ́ЩЕЕСЯ, Я́КО НЕТЛЕ́ННО, И ПА́ЧЕ ЕСТЕСТВА́ ВСЯ́КАГО РОЖДЕ́НИЯ: БО́Г БО РАЖДА́ЕМОЕ. СЕДА́ЛЕН, ГЛА́С 4. ПОДО́БЕН: ЯВИ́ЛСЯ ЕСИ́ ДНЕ́СЬ: ЯДЫ́Й ВЛАДЫ́КО СО УЧЕНИКИ́ ТВОИ́МИ, ТА́ИНСТВЕННО ЯВИ́Л ЕСИ́ ВСЕСВЯ́ТО́Е ТВОЕ́ ЗАКОЛЕ́НИЕ, И́МЖЕ ТЛИ́ ИЗБА́ВИХОМСЯ, ЧЕСТНАЯ ТВОЯ ПОЧИТА́ЮЩИИ СТРАДАНИЯ. ПЕ́СНЬ 8. ИРМО́С: ЕГО́ЖЕ ВО́ИНСТВА НЕБЕ́СНАЯ СЛА́ВЯТ, И ТРЕПЕ́ЩУТ ХЕРУВИ́МИ И СЕРАФИ́МИ, ВСЯ́КО ДЫХА́НИЕ И ТВА́РЬ: ПО́ЙТЕ, БЛА́ГОСЛОВИ́ТЕ И ПРЕВОЗНОСИ́ТЕ ВО ВСЯ ВЕ́КИ. ЗАКО́ННОЕ СКОНЧА́В ПОВЕЛЕ́НИЕ, СКРИЖАЛИ ЗАКО́ННЫЯ НАПИСА́ВЫЙ В СИНА́И, СНЕДЕ́ У́БО ПА́СХУ ДРЕ́ВНЮЮ И СЕНО́ВНУЮ: БЫ́СТЬ ЖЕ ПА́СХА ТА́ЙНАЯ И ЖИВОЖЕ́РТВЕННАЯ. ОТ ВЕ́КА СОКРОВЕ́ННУЮ ХРИСТЕ́ ПРЕМУ́ДРОСТЬ ТАЙНОВОДЯ́, ПОКАЗА́Л ЕСИ́ КУ́ПНО ВСЕМ АПО́СТОЛОМ СПА́СЕ НА ВЕ́ЧЕРИ, Ю́ЖЕ ЦЕ́РКВАМ ПРЕДА́ША БОГОНО́СНИИ. ЕДИ́Н ОТ ВА́С ЛЕ́СТИЮ ПРЕДА́СТ МЯ́, ЕВРЕ́ЕМ ПРОДА́В В НО́ЩЬ СИЮ́, СИЕ́ ХРИСТО́С ВОЗОПИ́В СМУЩА́ШЕ ДРУ́ГИ: ТОГДА́ ЕДИ́Н КО ЕДИ́НОМУ, НЕДОУМЕВА́ЯСЯ КОЛЕБА́ШЕСЯ. СМИРИ́ВСЯ НА́С РА́ДИ БОГА́ТЫЙ, ОТ ВЕ́ЧЕРИ ВОСТА́В, ЛЕ́НТИЙ ПРИЕ́М, СИ́М ПРЕПОЯ́САЛСЯ ЕСИ́, И ПРЕКЛО́НЬ ВЫ́Ю, ОМЫ́Л ЕСИ́ НО́ГИ УЧЕНИ́КО́В И ПРЕДА́ТЕЛЯ. ПА́ЧЕ УМА́, И НЕИЗРЕЧЕ́ННА РА́ЗУМА ВЫСОТЕ́ ТВОЕ́Й ИИСУ́СЕ, КТО́ НЕ УДИВИ́ТСЯ! Я́КО БРЕ́НИЮ ПРЕДСТА́Л ЕСИ́, СОДЕ́ТЕЛЮ ВСЯ́ЧЕСКИХ, ОМЫВА́Я У́БО НО́ГИ, ОТИРА́Я ЖЕ И ЛЕ́НТИЕМ. УЧЕНИ́К, ЕГО́ЖЕ ЛЮБЛЯ́ШЕ ГОСПО́ДЬ, НА ПЕ́РСИ ВОЗЛЕ́Г, РЕЧЕ́ К НЕМУ́: КТО́ ЕСТЬ ПРЕДАЯ́Й ТЯ́? ХРИСТО́С ЖЕ КО О́НОМУ: СЕ́Й ВЛОЖИ́ВЫЙ В СОЛИ́ЛО НЫ́НЕ РУ́КУ. УЧЕНИ́К ХЛЕ́Б ПРИЕ́МЫЙ, ПО ХЛЕ́БЕ ОТЛУЧА́ЕТСЯ, ПРОДА́НИЮ ПОУЧА́ЯЙСЯ, ТЕЧЕ́Т КО ИУДЕ́ЕМ, ГЛАГО́ЛЕТ БЕЗЗАКО́ННЫМ: ЧТО́ МНЕ́ ХО́ЩЕТЕ ДА́ТИ: И А́З ЕГО́ ВА́М ПРЕДА́М. БЛА́ГОСЛОВИ́М ОТЦА́, И СЫ́НА, И СВЯ́ТА́ГО ДУ́ХА, ГО́СПОДА. ЕДИ́НАГО БО́ГА ПО СУЩЕСТВУ́ ЧТУ́, ТРИ́ ВПОСТАСИ ПОЮ́ ОПРЕДЕЛИ́ТЕЛЬНЕ, И́НЫЯ, НО НЕ И́НАКОВЫЯ: ПОНЕ́ЖЕ БО́ЖЕСТВО́ ЕДИ́НО, В ТРИЕ́Х ЛИ́ЦЕХ, И́БО ОТЕ́Ц, И СЫ́Н, И БО́ЖЕ́СТВЕННЫЙ ДУ́Х. И НЫ́НЕ, БОГОРО́ДИЧЕН: ИЗБА́ВИ НА́С ИИСУ́СЕ СПА́СЕ НА́Ш ОТ ЛЕ́СТИ ЛУКА́ВАГО, И НАПА́СТИ: ПРИИМИ́ БОГОРО́ДИЦУ МОЛЯ́ЩУЮСЯ НЕПРЕСТА́ННО: МА́ТИ БО Е́СТЬ, И МО́ЖЕТ ТЯ́ УМОЛИ́ТИ. ХВА́ЛИМ, БЛА́ГОСЛОВИ́М: И ПА́КИ ИРМО́С: ЕГО́ЖЕ ВО́ИНСТВА НЕБЕ́СНАЯ: И ПОКЛО́Н. ПЕ́СНЬ 9. ИРМО́С: БЕЗСЕ́МЕННАГО ЗАЧА́ТИЯ РОЖДЕ́СТВО́ НЕСКАЗА́ННОЕ, МА́ТЕРЕ БЕЗМУ́ЖНЫЯ НЕТЛЕ́НЕН ПЛО́Д: БО́ЖИЕ БО РОЖДЕ́НИЕ ОБНОВЛЯ́ЕТ ЕСТЕСТВА́. ТЕ́МЖЕ ТЯ́ ВСИ́ РО́ДИ, Я́КО БОГОНЕВЕ́СТНУЮ МА́ТЕРЬ, ПРАВОСЛА́ВНО ВЕЛИЧА́ЕМ. ВЕЛИ́КОЕ ТА́ИНСТВО ТВОЕГО́ ВОЧЕЛОВЕ́ЧЕНИЯ, НА ВЕ́ЧЕРИ СОВОЗЛЕЖА́ЩУ ТЕБЕ́ УЧЕНИ́КО́М ТВОИМ ЧЕЛОВЕКОЛЮ́БЧЕ, ОТКРЫ́В РЕ́КЛ ЕСИ́: ЯДИ́ТЕ ХЛЕ́Б ЖИВО́ТНЫЙ ВЕ́РОЮ, ПИ́ЙТЕ И КРО́ВЬ ИЗЛИЯ́ННУЮ ОТ БОГОРЕ́БРЕННАГО ЗАКОЛЕ́НИЯ. СЕ́НЬ НЕБЕ́СНАЯ ЯВИ́СЯ ГО́РНИЦА, ИДЕ́ЖЕ ПА́СХУ ХРИСТО́С СОВЕРШИ́: ВЕ́ЧЕРЯ БЕЗКРО́ВНАЯ, И СЛОВЕ́СНАЯ СЛУ́ЖБА, ТРАПЕ́ЗА ЖЕ ТА́МО СОВЕРШЕ́ННЫХ ТАИН, МЫ́СЛЕННЫЙ ЖЕ́РТВЕННИК. ПА́СХА ХРИСТО́С Е́СТЬ ВЕЛИ́КАЯ И ВСЕЧЕСТНА́Я, СНЕДЕ́Н БЫ́В Я́КО ХЛЕ́Б, ЗАКЛА́Н ЖЕ Я́КО ОВЧА́: ТО́Й БО ВОЗНЕСЕ́СЯ О НА́С ЖЕ́РТВА. ТОГО́ ТЕ́ЛА БЛА́ГОЧЕ́СТНО, И ТОГО́ КРО́ВЕ ВСИ́ ТА́ЙНО ПРИЧАЩА́ЕМСЯ. ХЛЕ́Б БЛА́ГОСЛОВИ́В, ХЛЕ́Б СЫ́Й НЕБЕ́СНЫЙ, БЛА́ГОДАРИ́В ОТЦУ́ РОДИ́ТЕЛЮ, ПРИЕ́МЫЙ, И ЧА́ШУ УЧЕНИ́КО́М ДАВА́Л ЕСИ́: ПРИИМИ́ТЕ, ЯДИ́ТЕ, ВОПИЯ́, СИЕ́ Е́СТЬ ТЕ́ЛО МОЕ́, И КРО́ВЬ НЕТЛЕ́ННЫЯ ЖИ́ЗНИ. АМИ́НЬ ГЛАГО́ЛЯ, РЕЧЕ́ РО́ЖДИЯМ ЛОЗА́, АПО́СТОЛОМ ХРИСТО́С И́СТИНА: ОТСЕ́ЛЕ НЕ И́МАМ ПИ́ТИ ОТ ЛОЗЫ́ ПИТИЕ́, ДО́НДЕЖЕ ПИЮ́ Е́ НО́ВОЕ, ВО СЛА́ВЕ ОТЦА́ МОЕГО́, С ВА́МИ НАСЛЕ́ДНИКИ МОИ́МИ. ПРОДАЕ́ШИ НА ТРИ́ДЕСЯТИХ СРЕ́БРЕНИЦЕХ ГО́СПОДА, И НЕ ПОМЫШЛЯ́ЕШИ ИУ́ДО БЕЗЗАКО́ННЫЙ ВЕ́ЧЕРИ ТА́ИНСТВО, ИЛИ́ ЧЕСТНО́Е УМОВЕ́НИЕ. О КА́КО ПОПО́ЛЗСЯ ПАДЕ́НИЕМ В КОНЕ́Ц СВЕ́ТА ПРИШЕ́Л ЕСИ́, УДАВЛЕ́НИЕ ОБЛОБЫЗА́В! РУ́ЦЕ ПРОСТЕ́РЛ ЕСИ́, И́МИЖЕ ХЛЕ́Б ПРИЯ́Л ЕСИ́ НЕТЛЕ́НИЯ, ПРИЯ́ТИ СРЕ́БРЕНИКИ, УСТА́ К ЦЕЛОВА́НИЮ ПРИНОСЯ́ ЛЬСТИ́ВНО, И́МИЖЕ ТЕ́ЛО ХРИСТО́ВО И КРО́ВЬ ПРИЯ́Л ЕСИ́: НО ГО́РЕ ТЕБЕ́, Я́КОЖЕ РЕЧЕ́ ХРИСТО́С. ХРИСТО́С УЧРЕДИ́ МИ́Р, НЕБЕ́СНЫЙ И БО́ЖЕ́СТВЕННЫЙ ХЛЕ́Б: ПРИИДИ́ТЕ У́БО ХРИСТОЛЮ́БЦЫ, БРЕ́ННЫМИ УСТНА́МИ, ЧИ́СТЫМИ ЖЕ СЕРДЦЫ́, ПРИИ́МЕМ ВЕ́РНО ЖРЕ́МУЮ ПА́СХУ, В НА́С СВЯЩЕННОДЕ́ЙСТВУЕМУЮ. СЛА́ВА: ОТЦА́ ПРОСЛА́ВИМ, СЫ́НА ПРЕВОЗНЕСЕ́М, БО́ЖЕ́СТВЕННОМУ ДУ́ХУ ВЕ́РНО ПОКЛОНИ́МСЯ, ТРО́ИЦЕ НЕРАЗДЕ́ЛЬНЕЙ, ЕДИ́НИЦЕ ПО СУЩЕСТВУ́: Я́КО СВЕ́ТУ И СВЕ́ТОМ, ЖИВОТУ́ И ЖИВОТО́М, ЖИВОТВОРЯ́ЩЕМУ И ПРОСВЕЩА́ЮЩЕМУ КОНЦЫ́. И НЫ́НЕ, БОГОРО́ДИЧЕН: ЧЕРТО́Г НЕБЕ́СНЫЙ, И НЕВЕ́СТА ПРИСНОДЕ́ВА, ЕДИ́НА ЯВИ́ЛАСЯ ЕСИ́, БО́ГА НОСИ́ВШИ, РО́ЖДШИ ЖЕ НЕПРЕЛО́ЖНО, ИЗ ТЕБЕ́ ВОПЛОЩЕ́ННА. ТЕ́МЖЕ ТЯ́ ВСИ́ РО́ДИ Я́КО БОГОНЕВЕ́СТНУЮ МА́ТЕРЬ, ПРАВОСЛА́ВНО ВЕЛИЧА́ЕМ. (Л. 424) И ПА́КИ ИРМО́С: БЕЗСЕ́МЕННАГО ЗАЧА́ТИЯ: И ПРО́ЧЕЕ ПОВЕЧЕ́РИЯ МА́ЛАГО ПО ОБЫ́ЧАЮ, И ОТПУ́СТ, И ТВОРИ́М ПОКЛО́НЫ 3, ВСИ́ РА́ВНО КО́СНО. И БЫ́ВШЕЙ МОЛИ́ТВЕ, ОТ ПРЕДСТОЯ́ТЕЛЯ, ОТХО́ДИМ В КЕ́ЛЛИИ СВОЯ. ВЕ́ДОМО ЖЕ БУ́ДИ, Я́КО ОТ СЕГО́ СВЯ́ТА́ГО ДНЕ́, ПОЛУ́НОЩНИЦА НЕ ПОЕ́ТСЯ В ЦЕ́РКВИ, ДО СЕДМИ́ЦЫ ФОМИНЫ́. ВО СВЯ́ТЫ́Й И ВЕЛИ́КИЙ ЧЕТВЕРТО́К НА У́ТРЕНИ, КЛЕ́ПЛЕТ ПАРАЕККЛИСИА́РХ В СЕДМЫ́Й ЧА́С НО́ЩИ, И СОБРА́ВШИМСЯ НА́М В ЦЕ́РКОВЬ, И СОТВО́РШУ СВЯ́ЩЕ́ННИКУ НАЧА́ЛО: БЛА́ГОСЛОВЕ́Н БО́Г НА́Ш: НАЧИНА́ЕМ А́БИЕ ПО ОБЫ́ЧАЮ: ТА́ЖЕ ШЕСТОПСА́ЛМИЕ, ПО ИСПОЛНЕ́НИИ ШЕСТОПСА́ЛМИА, АЛЛИЛУ́ИА, НА ГЛА́С 8. И ТРОПА́РЬ ГЛА́С 8, ТРИ́ЖДЫ: ЕГДА́ СЛА́ВНИИ УЧЕНИ́ЦЫ́ НА УМОВЕ́НИИ ВЕ́ЧЕРИ ПРОСВЕЩА́ХУСЯ, ТОГДА́ ИУ́ДА ЗЛОЧЕСТИ́ВЫЙ СРЕБРОЛЮ́БИЕМ НЕДУ́ГОВАВ ОМРАЧА́ШЕСЯ, И БЕЗЗАКО́ННЫМ СУДИЯ́М ТЕБЕ́ ПРА́ВЕДНАГО СУДИЮ́ ПРЕДАЕ́Т. ВИ́ЖДЬ ИМЕ́НИЙ РАЧИ́ТЕЛЮ, СИ́Х РА́ДИ УДАВЛЕ́НИЕ УПОТРЕБИ́ВША! БЕЖИ́ НЕСЫ́ТЫЯ ДУШИ́, УЧИ́ТЕЛЮ ТАКОВА́Я ДЕРЗНУ́ВШИЯ: И́ЖЕ О ВСЕ́Х БЛА́ГИ́Й, ГО́СПОДИ СЛА́ВА ТЕБЕ́. ТА́ЖЕ, ЕВА́НГЕЛИЕ ОТ ЛУКИ́ ЗАЧА́ЛО 108, БЕЗ ПРЕСТУ́ПКИ: ВО ВРЕ́МЯ О́НО, ПРИБЛИ́ЖАШЕСЯ ПРА́ЗДНИК ОПРЕСНО́К: КОНЕ́Ц В ЗАЧА́ЛЕ 109-М: ПО НЕ́МЖЕ ИДО́ША УЧЕНИ́ЦЫ́ ЕГО́. И ПСАЛО́М 50. МОЛИ́ТВЫ ЖЕ, СПА́СИ́ БО́ЖЕ ЛЮ́ДИ ТВОЯ: НЕ ГЛАГО́ЛЕМ. И НАЧИНА́ЕМ КАНО́Н, ТВОРЕ́НИЕ ГОСПОДИ́НА КОСМЫ́, ГЛА́С 6: ИРМОСЫ́ ПО ДВА́ЖДЫ, ТРОПАРИ́ ЖЕ НА 6. КАНО́Н, ЕГО́ЖЕ КРАЕСТРО́ЧИЕ: ТИ́ МАКРА́ ПЕ́МПТИ МАКРО́Н ИМНОН ЕКСА́ДО. Е́ЖЕ Е́СТЬ, В ВЕЛИ́КИЙ ЧЕТВЕРТО́К ДО́ЛГУЮ ПЕ́СНЬ ПОЮ́. (Л. 424 ОБ.) ПЕ́СНЬ 1. [Т] ИРМО́С: СЕ́ЧЕНОЕ СЕЧЕ́ТСЯ МО́РЕ ЧЕРМНО́Е, ВОЛНОПИТА́ЕМАЯ ЖЕ ИЗСУША́ЕТСЯ ГЛУБИНА́: ТА́ЯЖДЕ КУ́ПНО БЕЗОРУЖНЫМ БЫ́ВШИ ПРОХОДИ́МА, И ВСЕОРУЖНЫМ ГРО́Б. ПЕ́СНЬ ЖЕ БОГОКРА́СНАЯ ВОСПЕВА́ШЕСЯ: СЛА́ВНО ПРОСЛА́ВИСЯ ХРИСТО́С БО́Г НА́Ш. [И] ВСЕВИНО́ВНАЯ И ПОДА́ТЕЛЬНАЯ ЖИ́ЗНИ, БЕЗМЕ́РНАЯ МУ́ДРОСТЬ БО́ЖИЯ, СОЗДА́ ХРА́М СЕБЕ́ ОТ ЧИ́СТЫЯ НЕИСКУСОМУ́ЖНЫЯ МА́ТЕРЕ: В ХРА́М БО ТЕЛЕ́СНО ОБОЛКИ́ЙСЯ, СЛА́ВНО ПРОСЛА́ВИСЯ ХРИСТО́С БО́Г НА́Ш. [М] ТАЙНОВОДЯ́ЩИ ДРУ́ГИ СВОЯ, ДУШЕПИТА́ТЕЛЬНУЮ УГОТОВЛЯ́ЕТ ТРАПЕ́ЗУ, БЕЗСМЕ́РТИЯ ЖЕ ВОИ́СТИННУ МУ́ДРОСТЬ БО́ЖИЯ РАСТВОРЯ́ЕТ ЧА́ШУ ВЕРНЫМ. ПРИСТУ́ПИМ БЛА́ГОЧЕ́СТНО, И ВОЗОПИИ́М: СЛА́ВНО ПРОСЛА́ВИСЯ ХРИСТО́С БО́Г НА́Ш. [А] УСЛЫ́ШИМ ВСИ́ ВЕ́РНИИ, СОЗЫВА́ЮЩУЮ ВЫСО́КИМ ПРОПОВЕ́ДАНИЕМ, НЕСОЗДА́ННУЮ И ЕСТЕ́СТВЕННУЮ ПРЕМУ́ДРОСТЬ БО́ЖИЮ, ВОПИЕ́Т БО: ВКУСИ́ТЕ И РАЗУМЕ́ВШЕ, Я́КО ХРИСТО́С А́З, ВОЗОПИ́ЙТЕ: СЛА́ВНО ПРОСЛА́ВИСЯ ХРИСТО́С БО́Г НА́Ш. ПОСЛЕДИ́ ЖЕ ПА́КИ ИРМО́С О́БА ЛИКА ВКУ́ПЕ. ПЕ́СНЬ 3. [К] ИРМО́С: ГО́СПОДИ СЫ́Й ВСЕ́Х, И ЗИЖДИ́ТЕЛЬ БО́Г, СОЗДА́ННОЕ БЕЗСТРА́СТНЫЙ ОБНИЩА́В СЕБЕ́ СОЕДИНИ́, И ПА́СХА ЗА Я́ЖЕ ХОТЯ́ШЕ УМРЕ́ТИ, СА́М СЫ́Й СЕБЕ́ ПРЕДПОЖРЕ́: ЯДИ́ТЕ, ВОПИЯ́, ТЕ́ЛО МОЕ́, И ВЕ́РОЮ УТВЕРДИ́ТЕСЯ. [Р] ИЗБА́ВИТЕЛЬНОЮ ВСЕГО́ РО́ДА ЧЕЛОВЕ́ЧА, ТВОЕ́Ю БЛА́ЖЕ ТВОЯ УЧЕНИ́КИ́ НАПОИ́Л ЕСИ́ ВЕСЕ́ЛИЯ ЧА́ШЕЮ, НАПО́ЛНИВ Ю́, СА́М БО СЕБЕ́ СВЯ́ЩЕННОДЕ́ЙСТВУЕШИ, ПИ́ЙТЕ, ВОПИЯ́, КРО́ВЬ МОЮ́, И ВЕ́РОЮ УТВЕРДИ́ТЕСЯ. [А] БЕЗУ́МНЫЙ МУ́Ж И́ЖЕ В ВА́С ПРЕДА́ТЕЛЬ, УЧЕНИ́КО́М ТВОИМ ПРЕДРЕ́КЛ ЕСИ́ НЕЗЛО́БИВЕ, НЕ УРАЗУМЕ́ЕТ СИ́Х, И ТО́Й НЕСМЫ́СЛЕН СЫ́Й НЕ И́МАТЬ РАЗУМЕ́ТИ. ОБА́ЧЕ ВО МНЕ́ ПРЕБУ́ДИТЕ, И ВЕ́РОЮ УТВЕРДИ́ТЕСЯ. СЕДА́ЛЕН, ГЛА́С 1. ПОДО́БЕН: ГРО́Б ТВО́Й: ЕЗЕ́РА И ИСТО́ЧНИКИ И МОРЯ́ СОТВОРИ́ВЫЙ, СМИРЕ́НИЮ НА́С НАКАЗУ́Я ИЗРЯ́ДНОМУ, ЛЕ́НТИЕМ ОПОЯ́САВСЯ, УЧЕНИКО́В НО́ГИ УМЫ́, СМИРЯ́ЯСЯ ПРЕМНО́ЖЕСТВОМ БЛА́ГОУТРО́БИЯ, И ВОЗВЫША́Я НА́С ОТ ПРО́ПАСТЕЙ ЗЛО́БЫ, ЕДИ́Н ЧЕЛОВЕКОЛЮ́БЕЦ. СЛА́ВА, ГЛА́С 3. ПОДО́БЕН: БО́ЖЕ́СТВЕННЫЯ ВЕ́РЫ: СМИРЯ́ЯСЯ ЗА БЛА́ГОУТРО́БИЕ, НО́ГИ УМЫ́Л ЕСИ́ УЧЕНИКО́В ТВОИ́Х, И К ТЕЧЕ́НИЮ БО́ЖЕ́СТВЕННОМУ СИЯ НАПРА́ВИЛ ЕСИ́: НЕ ПОВИНУ́ЯСЯ ЖЕ ПЕ́ТР УМЫ́ТИСЯ, А́БИЕ БО́ЖЕ́СТВЕННОМУ ПОВИНУ́ЕТСЯ ПОВЕЛЕ́НИЮ, ОМЫВА́ЕМЬ, И ТЕБЕ́ ПРИЛЕ́ЖНО МОЛЯ́СЯ, ДАРОВА́ТИ НА́М ВЕ́ЛИЮ МИ́ЛОСТЬ. И НЫ́НЕ, ГЛА́С 4. ПОДО́БЕН: ЯВИ́ЛСЯ ЕСИ́ ДНЕ́СЬ: ЯДЫ́Й ВЛАДЫ́КО СО УЧЕНИКИ́ ТВОИ́МИ, ТА́ИНСТВЕННО ЯВИ́Л ЕСИ́ ВСЕСВЯ́ТО́Е ТВОЕ́ ЗАКОЛЕ́НИЕ, И́МЖЕ ТЛИ́ ИЗБА́ВИХОМСЯ, ЧЕСТНАЯ ТВОЯ ПОЧИТА́ЮЩИИ СТРАДАНИЯ. ПЕ́СНЬ 4. [П] ИРМО́С: ПРОВИ́ДЕВ ПРОРО́К ТА́ЙНУ ТВОЮ́ НЕИЗРЕЧЕ́ННУЮ ХРИСТЕ́, ПРОВОЗГЛАСИ́: ПОЛОЖИ́Л ЕСИ́ ТВЕ́РДУЮ ЛЮБО́ВЬ КРЕ́ПОСТИ О́ТЧЕ ЩЕ́ДРЫЙ: ЕДИНОРО́ДНАГО БО СЫ́НА БЛА́ГИ́Й, ОЧИЩЕ́НИЕ В МИ́Р ПОСЛА́Л ЕСИ́. [Е] НА СТРА́СТЬ ВСЕМ СУ́ЩИМ ИЗ АДА́МА ИСТОЧИ́ВШУЮ БЕЗСТРА́СТИЕ, ХРИСТЕ́ ГРЯДЫ́Й, ДРУГО́М ТВОИМ РЕ́КЛ ЕСИ́: С ВА́МИ ПА́СХИ СЕЯ́ ПРИЧАСТИ́ТИСЯ ВОЗЖЕЛА́Х: ЕДИНОРО́ДНАГО БО МЯ́ ОЧИЩЕ́НИЕ ОТЕ́Ц В МИ́Р ПОСЛА́Л Е́СТЬ. [М] ПРИЧАЩА́ЯСЯ ЧА́ШИ, УЧЕНИ́КО́М ВОПИЯ́Л ЕСИ́ БЕЗСМЕ́РТНЕ: ПЛОДА́ ЛО́ЗНАГО КТОМУ́ НЕ ПИЮ́ ПРО́ЧЕЕ, С ВА́МИ ЖИВЯ́: ЕДИНОРО́ДНАГО БО МЯ́ ОЧИЩЕ́НИЕ ОТЕ́Ц В МИ́Р ПОСЛА́Л Е́СТЬ. [П] ПИТИЕ́ НО́ВОЕ ПА́ЧЕ СЛО́ВА, А́З ГЛАГО́ЛЮ, ВО ЦА́РСТВИИ МОЕ́М, ХРИСТО́С ДРУГО́М, ПИЮ́, Я́КОЖЕ БО БО́Г С ВА́МИ БО́ГИ БУ́ДУ, РЕ́КЛ ЕСИ́: ЕДИНОРО́ДНАГО БО МЯ́ ОЧИЩЕ́НИЕ ОТЕ́Ц В МИ́Р ПОСЛА́Л Е́СТЬ. ПЕ́СНЬ 5. [Т] ИРМО́С: СОЮ́ЗОМ ЛЮБВЕ́ СВЯЗУ́ЕМИ АПО́СТОЛИ, ВЛАДЫ́ЧЕСТВУЩЕМУ ВСЕ́МИ СЕБЕ́ ХРИСТУ́ ВОЗЛО́ЖШЕ, КРА́СНЫ НО́ГИ ОЧИЩА́ХУ, БЛА́ГОВЕСТВУ́ЮЩЕ ВСЕМ МИ́Р. [И] НЕОДЕРЖИ́МУЮ ДЕРЖА́ЩАЯ, И ПРЕВЫ́СПРЕННЮЮ НА ВОЗДУ́СЕ ВО́ДУ, БЕ́ЗДНЫ ОБУЗДОВА́ЮЩАЯ, И МОРЯ́ ВОСТЯЗУ́ЮЩАЯ БО́ЖИЯ ПРЕМУ́ДРОСТЬ, ВО́ДУ ВО УМЫВА́ЛЬНИЦУ ВЛИВА́ЕТ, НО́ГИ ЖЕ ОМЫВА́ЕТ РАБО́В ВЛАДЫ́КА. [М] УЧЕНИ́КО́М ПОКАЗУ́ЕТ СМИРЕ́НИЯ О́БРАЗ ВЛАДЫ́КА, О́БЛАКИ ОБЛАГА́ЯЙ НЕ́БО, ПРЕПОЯСУ́ЕТСЯ ЛЕ́НТИЕМ, И ПРЕКЛОНЯ́ЕТ КОЛЕ́НА, РАБО́М ОМЫ́ТИ НО́ГИ, В ЕГО́ЖЕ РУЦЕ́ ДЫХА́НИЕ ВСЕ́Х СУ́ЩИХ. ПЕ́СНЬ 6. [А] ИРМО́С: БЕ́ЗДНА ПОСЛЕ́ДНЯЯ ГРЕХО́В ОБЫ́ДЕ МЯ́, И ВОЛНЕ́НИЯ НЕ КТОМУ́ ТЕРПЯ́, Я́КО ИО́НА ВЛАДЫ́ЦЕ ВОПИЮ́ ТИ: ОТ ТЛИ́ МЯ ВОЗВЕДИ́. [К] ГО́СПОДА ГЛАША́ЕТЕ МЯ́, О УЧЕНИЦЫ́, И УЧИ́ТЕЛЯ: Е́СМЬ БО, СПА́СЕ ВОПИЯ́Л ЕСИ́. ТЕ́МЖЕ ПОДРАЖА́ЙТЕ О́БРАЗ, ЕГО́ЖЕ ВО МНЕ́ ВИ́ДЕСТЕ. [Р] СКВЕ́РНЫ КТО́ НЕ ИМЕ́Я, ОМЫ́ТИ НЕ ТРЕ́БУЕТ НО́Г: ЧИ́СТИ ЖЕ, О УЧЕНИЦЫ́ ВЫ́, НО НЕ ВСИ́: МГНОВЕ́НИЕМ БО БЕЗЧИ́ННО ЕДИ́Н ОТ ВА́С НЕИ́СТОВСТВУЕТ. КОНДА́К, ГЛА́С 2. ПОДО́БЕН: ВЫ́ШНИХ ИЩЯ́: ХЛЕ́Б ПРИЕ́М В РУ́ЦЕ ПРЕДА́ТЕЛЬ, СОКРОВЕ́ННО ТЫЯ ПРОСТИРА́ЕТ, И ПРИЕ́МЛЕТ ЦЕ́НУ СОЗДА́ВШАГО СВОИ́МА РУКА́МА ЧЕЛОВЕ́КА, И НЕИСПРА́ВЛЕН ПРЕБЫ́СТЬ ИУ́ДА РА́Б И ЛЬСТЕ́Ц. И́КОС: ТА́ЙНОЙ ТРАПЕ́ЗЕ, В СТРА́СЕ ПРИБЛИ́ЖИВШЕСЯ ВСИ́, ЧИ́СТЫМИ ДУША́МИ ХЛЕ́Б ПРИИ́МЕМ, СПРЕБЫВА́ЮЩЕ ВЛАДЫ́ЦЕ: ДА ВИ́ДИМ, КА́КО УМЫВА́ЕТ НО́ГИ УЧЕНИКО́В, И СОТВОРИ́М, Я́КОЖЕ ВИ́ДИМ, ДРУ́Г ДРУ́ГУ ПОКАРЯ́ЮЩЕСЯ, И ДРУ́Г ДРУ́ГУ НО́ЗЕ УМЫВА́ЮЩЕ, ХРИСТО́С БО ТА́КО ПОВЕЛЕ́ СВОИМ УЧЕНИ́КО́М, ПРЕДРЕ́К ТА́КО ТВОРИ́ТИ: НО НЕ УСЛЫ́ША ИУ́ДА РА́Б И ЛЬСТЕ́Ц. СИНАКСА́РЬ. СТИХИ́ ВО СВЯ́ЩЕ́ННОЕ УМОВЕ́НИЕ: УМЫВА́ЕТ УЧЕНИ́КО́В В ВЕ́ЧЕР БО́Г НО́ГИ: ЕГО́ЖЕ НОГА́ ПОПИРА́Я БЕ́ ВО ЕДЕ́МЕ ПРЕЩЕ́НИЕ ДРЕ́ВЛЕ. НА ТА́ИНСТВЕННУЮ ВЕ́ЧЕРЮ СТИХИ́: СУГУ́БАЯ ВЕ́ЧЕРЯ, ПА́СХУ БО ЗАКО́НА НО́СИТ: И ПА́СХУ НО́ВУЮ, КРО́ВЬ, ТЕ́ЛО ВЛАДЫ́ЧНЕЕ. НА ПРЕЕСТЕ́СТВЕННУЮ МОЛИ́ТВУ СТИХИ́: МОЛИ́ТВА И СТРАШИ́ЛИЩЕ, ТРУДЫ́ КРОВЕ́Й: ХРИСТЕ́ ЛИЦУ́ Я́ВЕ МОЛЯ́СЯ. СМЕ́РТЬ, ВРАГА́ ПРЕЛЬЩА́Я В СИ́Х. НА ПРЕДА́ТЕЛЬСТВО СТИХИ́: ЧТО́ ТРЕ́БЕ НОЖЕ́Й? ЧТО́ ДРЕВЕ́С ЛЮДОЛЕ́СТЦЫ, НА ХОТЯ́ЩАГО УМРЕ́ТИ ВО ИЗБАВЛЕ́НИЕ МИ́РА? ВО СВЯ́ТЫ́Й И ВЕЛИ́КИЙ ЧЕТВЕРТО́К, И́ЖЕ ВСЯ ДО́БРЕ СЧИНИ́ВШИИ БО́ЖЕ́СТВЕННИИ ОТЦЫ́, ДРУГЪДРУГОПРИИМА́ТЕЛЬНО ОТ БО́ЖЕ́СТВЕННЫХ ЖЕ АПО́СТОЛ, И СВЯ́ЩЕ́ННЫХ И БО́ЖЕ́СТВЕННЫХ ЕВА́НГЕЛИЙ, ПРЕДА́ША НА́М ЧЕТЫ́РЕ НЕКАЯ ПРА́ЗДНОВАТИ: СВЯ́ЩЕ́ННОЕ УМОВЕ́НИЕ: ТА́ЙНУЮ ВЕ́ЧЕРЮ: ПРЕДА́НИЕ Я́ВЕ Е́ЖЕ ПО НА́М СТРА́ШНЫХ ТАИН: ПРЕЕСТЕ́СТВЕННУЮ МОЛИ́ТВУ, И СА́МОЕ ТО́ ПРЕДА́ТЕЛЬСТВО: ПОНЕ́ЖЕ БО ЕВРЕ́ЙСКАЯ ФА́СКА ПО ПЯТЦЕ́ ЖРЕ́ТИСЯ ИМЯ́ШЕ. БЯ́ШЕ ЖЕ У́БО ПРИКЛА́ДНО, ОБРАЗОВА́НИЮ ПОСЛЕ́ДСТВОВАТИ И И́СТИНЕ, В ТО́М Я́ВЕ И Е́ЖЕ ПО НА́М ПА́СЦЕ ЖРЕ́ТИСЯ ХРИСТУ́, ПРЕДВАРИ́В ГОСПО́ДЬ НА́Ш ИИСУ́С ХРИСТО́С, Я́КОЖЕ БО́ЖЕ́СТВЕННИИ ОТЦЫ́ ГЛАГО́ЛЮТ, ДЕ́ЙСТВУЕТ ТУ́Ю СО УЧЕНИ́КИ́ В ВЕ́ЧЕР ЧЕТВЕРТКА́. ТО́Й БО ВЕ́ЧЕР И ПЯТО́К ВЕ́СЬ, ЕДИ́Н ДЕ́НЬ У ЕВРЕ́Й ВМЕНЯ́ЕТСЯ: СИ́ЦЕ БО ОНИ́ ЧИ́СЛЯТ НОЩЕДЕ́НСТВО ГЛАГО́ЛЮЩЕ. ДЕ́ЙСТВОВА У́БО СИЮ́ И ТОГДА́ [Я́КОЖЕ РЕ́ША НЕ́ЦЫИ] СО УЧЕНИ́КИ́ ПО ЗАКО́НУ, И́ХЖЕ ЕДИ́Н Е́СТЬ И БО́ЖЕ́СТВЕННЫЙ ЗЛАТОУ́СТ. ПЕ́РВОЕ ПРО́СТО СТОЯ́ЩЕ, И ОПОЯ́САНИ, В САПОГИ́ ОБУВЕ́НИ, ЖЕЗЛЫ́ ПОДПИРА́ЮЩЕСЯ, И И́НА ЕЛИКА ЗАКО́Н ПОВЕЛЕВА́ЕТ, ДА НЕ ЗАКОНОПРЕСТУ́ПЕН ВОЗНЕПЩУ́ЕТСЯ. СИЯ БО ЗЕВЕДЕ́Й УГОТО́ВА: СЕ́Й БО СКУДЕ́ЛЬ НОСЯ́Й ВОДЫ́, Я́КОЖЕ ВЕЛИ́КИЙ ГЛАГО́ЛЕТ АФАНА́СИЙ, А́ЩЕ И́НИИ И́НАКО О СЕ́М РЕ́ША. ПОТО́М ЖЕ УЧЕНИ́КО́М СОВЕРШЕ́ННЕЙШАЯ ПОКАЗУ́Я, И Е́ЖЕ ПО НА́М ПА́СХИ ТА́ИНСТВО ПРЕДАЕ́Т НА ГО́РНИЦЕ, УЖЕ́ НАШЕ́ДШЕЙ НО́ЩИ. ВЕ́ЧЕРИ БО, ГЛАГО́ЛЕТ, БЫ́ВШЕЙ, ВОЗЛЕЖЕ́ СО ДВЕМАНА́ДЕСЯТЬ. ЗРИ́ ЖЕ, Я́КО НЕ СИЕ́ БЯ́ШЕ ЗАКО́ННАЯ ПА́СХА, ВЕ́ЧЕРЯ БО И ВОЗЛЕЖА́НИЕ, И ХЛЕ́Б, И ВОДА́: ТА́МО ЖЕ ВСЯ ПЕЧЕ́НА ОГНЕ́М, И БЕЗКВАСНА. ПРЕ́ЖДЕ ЖЕ НАЧА́ТИЯ Е́ЖЕ ВЕЧЕРЯ́ТИ, [СИ́ЦЕ БО ГЛАГО́ЛЕТ БО́ЖЕ́СТВЕННЫЙ ЗЛАТОУ́СТ] ОТ ВЕ́ЧЕРИ ВОСТАЕ́Т, И ПОЛАГА́ЕТ НИ́ЗУ РИЗЫ, И ВО́ДУ ВО УМЫВА́ЛЬНИЦУ ВЛИВА́ЕТ СА́М САМОДЕ́ЙСТВУЯЙ ВСЯ, ВКУ́ПЕ У́БО ИУ́ДУ УСРАМЛЯ́Я, ВКУ́ПЕ ЖЕ И ДРУГИМ УЧЕНИ́КО́М ВОСПОМИНА́Я, Е́ЖЕ СТАРЕ́ЙШИНСТВА НЕ ИСКА́ТИ. Я́КОЖЕ И ПО УМОВЕ́НИИ НАКАЗУ́ЕТ, ГЛАГО́ЛЯ: ХОТЯ́Й БЫ́ТИ ПЕ́РВЫЙ, ДА БУ́ДЕТ ВСЕ́Х ПОСЛЕ́ДНИЙ, САМОГО́ СЕБЕ́ ПОЛОЖИ́В ВО УКАЗА́НИЕ. ЯВЛЯ́ЕТСЯ ЖЕ, Я́КО ПРЕ́ЖДЕ ВСЕ́Х ИУ́ДУ УМЫ́ ХРИСТО́С, БЕЗСТУ́ДНЕ ПРЕДСЕ́ДША: ПОСЛЕДИ́ ЖЕ К ПЕТРУ́ ПРИХО́ДИТ: СЕ́Й ЖЕ ТЕ́ПЛЬШИЙ ИНЫ́Х СЫ́Й, УЧИТЕЛЮ ВОЗБРАНЯ́ЕТ, И ОСТАВЛЯ́ЕТ ПА́КИ ЗЕ́ЛЬНЕЕ. УМЫ́В У́БО И́Х НО́ГИ, И ВОЗВЫШЕ́НИЕ ПРЕСЛА́ВНОЕ СМИРЕ́НИЕМ ПОКАЗА́В, ВЗЕ́М РИЗЫ ПА́КИ, И ВОЗЛЕ́Г, НАКАЗУ́ЕТ И́Х ЛЮБИ́ТИ ДРУ́Г ДРУ́ГА, И СТАРЕ́ЙШИНСТВА НЕ ИСКА́ТИ. ЯДУ́ЩИМ ЖЕ И́М, И О ПРЕДА́ТЕЛЬСТВЕ ВВО́ДИТ НАЧА́ЛО. МЯТУ́ЩИМСЯ ЖЕ О СЛОВЕСИ́ УЧЕНИКО́М, ГЛАГО́ЛЕТ ИИСУ́С ИОА́ННУ ЕДИ́НОМУ ТА́ЙНО: ЕМУ́ЖЕ А́З ОМОЧИ́В ХЛЕ́Б ПОДА́М, ТО́Й Е́СТЬ ПРЕДАЯ́Й МЯ́. А́ЩЕ БО БЫ́ ВЕ́ДАЛ ПЕ́ТР СЛО́ВО, А́КИ СЫ́Й ИНЫ́Х ТЕ́ПЛЬШИЙ, ИУ́ДУ УБИ́Л БЫ БЯ́ШЕ. И ПА́КИ: ОМОЧИ́ВЫЙ СО МНО́Ю В СОЛИ́ЛО РУ́КУ: Я́КОЖЕ ОБОЯ́ БЫ́ША. ТА́ЖЕ МА́ЛО ЧТО́ ОСТА́ВЛЬ, ВЗЕ́М ХЛЕ́Б, ГЛАГО́ЛЕТ: ПРИИМИ́ТЕ, ЯДИ́ТЕ, И ЧА́ШУ ПОДО́БНЕ: ПИ́ЙТЕ ОТ НЕЯ́ ВСИ́, РЕ́К, СИЯ́ Е́СТЬ КРО́ВЬ МОЯ́ НО́ВАГО ЗАВЕ́ТА, СИЕ́ ТВОРИ́ТЕ В МОЕ́ ВОСПОМИНА́НИЕ. ОБА́ЧЕ И СА́М СИЕ́ ТВОРЯ́, ЯДЯ́ШЕ И ПИЯ́ШЕ С НИ́МИ. ЗРИ́ ЖЕ, Я́КО ХЛЕ́Б ГЛАГО́ЛЕТ ТЕ́ЛО СВОЕ́, А НЕ ОПРЕСНО́К: ДА ПОСТЫДЯ́ТСЯ У́БО И́ЖЕ ЖЕ́РТВЕ ОПРЕСНО́К ПРИНОСЯ́ЩИИ. ПО ХЛЕ́БЕ ЖЕ ВНИ́ДЕ ВО ИУ́ДУ САТАНА́: ИСКУША́ЯЙ БО ЕГО́ ПРЕ́ЖДЕ, НЫ́НЕ ВСЕКОНЕ́ЧНО В НЕГО́ ВСЕЛИ́СЯ. И ИЗШЕ́Д, ГЛАГО́ЛЕТ: СЛОЖЕ́НИЕ ПОЛОЖИ́ АРХИЕРЕ́ЕМ, ДА ПРЕДА́СТ ЕГО́ И́М НА ТРИ́ДЕСЯТИ СРЕ́БРЕНИЦЕХ. УЧЕНИЦЫ́ ЖЕ ПО ВЕ́ЧЕРИ ИЗЫДО́ША НА ГО́РУ ЕЛЕО́НСКУЮ, В НЕ́КОЕ СЕЛО́, ГЛАГО́ЛЕМОЕ ГЕФСИМАНИ́. ПО МНО́ЗЕ ЖЕ ГЛАГО́ЛЕТ И́М ИИСУ́С: ВЫ́ ВСИ́ СОБЛАЗНИТЕ́СЯ О МНЕ́ В НОЩИ́ СЕ́Й. ПЕ́ТР ЖЕ РЕЧЕ́: А́ЩЕ И ВСИ́, А́З НЕ ОТВЕ́РГУСЯ ТЕБЕ́: БЯ́ШЕ ЖЕ ПО́ЗДЕ, СИ́РЕЧЬ ГЛУБОКОНО́ЩИЕ. О́Н ЖЕ ГЛАГО́ЛА: ПРЕ́ЖДЕ ДА́ЖЕ НЕ ВОЗГЛАСИ́Т ПЕ́ТЕЛЬ ДВА́ЩИ, ОТВЕ́РЖЕШИСЯ МЕНЕ́ ТРИ́ЖДЫ, Е́ЖЕ И БЫ́СТЬ. БОЯ́ЗНИЮ БЕЗМЕ́РНОЮ ПЕТРУ́ Я́ТУ БЫ́ВШУ: БО́ГУ НЕМОЩНО́Е ПОКАЗУ́ЮЩУ ЕСТЕСТВА́, И КУ́ПНО ПОНЕ́ЖЕ ВСЕЛЕ́ННУЮ ЕМУ́ ВРУЧИ́, ДА ОТ СВОЕГО́ ЕСТЕСТВА́ УДОБОВОДИ́ТЕЛЬНОЕ РАЗУМЕ́В, МИ́ЛОСТИВЕН БУ́ДЕТ К СОГРЕША́ЮЩИМ: ОБА́ЧЕ ТРИКРА́ТНОЕ ПЕТРО́ВО ОТВЕРЖЕ́НИЕ, ВСЕ́Х ЧЕЛОВЕ́КОВ ГРЕ́Х К БО́ГУ ИЗОБРАЗОВА́ШЕ. ПЕ́РВОЕ, ЗА́ПОВЕДЬ Ю́ЖЕ ПРЕСТУПИ́ АДА́М. ВТОРО́Е, ПИ́САННАГО ЗАКО́НА ПРЕСТУПЛЕ́НИЕ. ТРЕ́ТИЕ ЖЕ, СА́МОЕ ВОПЛОЩЕ́НИЕ СЛО́ВА: Е́ЖЕ ПА́КИ ПОСЛЕДИ́ СПА́С ТРЕГУ́БЫМ ПОКАЯ́НИЕМ ИСЦЕЛИ́: ЗА Е́ЖЕ, ПЕ́ТРЕ, ЛЮ́БИШИ ЛИ МЯ́, ТРИ́ЖДЫ ИЗРЕЩИ́. ПО СИ́Х ЖЕ ГЛАГО́ЛЕТ УЧЕНИ́КО́М, [ЧЕЛОВЕ́ЧЕСКОЕ ПОКАЗУ́Я, Я́КО СТРАШНА́ ВСЕМ СМЕ́РТЬ] ПРИСКО́РБНА Е́СТЬ ДУША́ МОЯ́ ДА́ЖЕ ДО СМЕ́РТИ. И ПРЕШЕ́Д Я́КО КА́МЕНЕ ВЕРЖЕ́НИЕ, ПОМОЛИ́СЯ ТРИКРА́ТЫ, РЕ́К: О́ТЧЕ МО́Й, А́ЩЕ НЕ ВОЗМО́ЖЕТ ЧА́ША СИЯ́ ПРЕЙТИ́ ОТ МЕНЕ́, А́ЩЕ Ю́ НЕ ПИЮ́: ДА БУ́ДЕТ ВО́ЛЯ ТВОЯ́. И ПА́КИ: О́ТЧЕ, А́ЩЕ МО́ЩНО, ДА МИ́МО И́ДЕТ ОТ МЕНЕ́ ЧА́ША СИЯ́? КУ́ПНО У́БО Я́КО ЧЕЛОВЕ́К СИЕ́ ГЛАГО́ЛЯ, КУ́ПНО ЖЕ И ДИА́ВОЛА ПРЕХОДЯ́ ХИ́ТРОСТНО: Я́КО ДА НЕПЩУ́Я И О́НАГО ЧЕЛОВЕ́КА БЫ́ТИ, ЗА Е́ЖЕ НЕ́ГЛИ БОЯ́ТИСЯ, СМЕ́РТИ РА́ДИ КРЕ́СТНЫЯ НЕ ПРЕСЕЧЕ́Т ТА́ИНСТВА. ВОЗВРА́ЩЬСЯ ЖЕ И ОБРЕ́Т УЧЕНИ́КИ́ СНО́М ПОГРУЖЕ́НЫ, К ПЕТРУ́ ОБРАЩА́ЕТСЯ, СИ́ЦЕ ГЛАГО́ЛЯ: НИ ЕДИ́НАГО ЛИ ЧАСА́ ВОЗМОГО́СТЕ ПОБДЕ́ТИ СО МНО́Ю? СИ́РЕЧЬ, ТЫ́ ГЛАГО́ЛЯЙ ДА́ЖЕ И ДО СМЕ́РТИ ПОДВИЗА́ТИСЯ, СИ́ЦЕ СО́НСТВУЕШИ С ПРО́ЧИМИ. ПРИШЕ́Д ЖЕ ОБ О́Н ПО́Л ПОТО́КА КЕ́ДРСКАГО, ИДЕ́ЖЕ БЕ́ ВЕРТОГРА́Д ВОДВОРИ́СЯ ТА́МО СО УЧЕНИКИ́ СВОИ́МИ. ЧА́СТО ЖЕ ТА́МО ПРИХОДИ́ТИ ОБЫ́ЧАЙ ИМЕ́ЯШЕ. ТЕ́М И ИУ́ДА ВЕ́ДЯШЕ МЕ́СТО: И́ЖЕ НЕ́КИХ ОТ ВО́ИН ВЗЕ́М, И НАРО́ДУ ПОСЛЕ́ДУЮЩУ, ПРИИ́ДЕ НА ИИСУ́СА, ДА́В И́М ЛОБЗА́НИЯ ЗНА́МЕНИЕ. СИЕ́ ЖЕ РЕЧЕ́, ЗАНЕ́ЖЕ МНО́ГАЖДЫ УДЕРЖА́Н БЫ́В, НЕЯ́ВЛЕН ОТ СРЕДЫ́ И́Х ПРОХОЖДА́ШЕ: Я́КОЖЕ И ЗДЕ́ СА́М ХРИСТО́С ПРЕ́ЖДЕ ИСХО́ДИТ К НИМ ГЛАГО́ЛЯ: КОГО́ И́ЩЕТЕ? ОНИ́ ЖЕ ЕГО́ И ЕЩЕ́ НЕ ПОЗНАВА́ХУ, НЕ БО́ НО́ЩЬ ПРЕТЫКА́НИЯ БЯ́ШЕ, СВЕТИЛА БО БЕ́ША, ГЛАГО́ЛЕТ, И СВЕЩИ́ ГОРЯ́ЩЯ, И СТРА́ХОМ ПА́ДШЕ ОТЛУЧИ́ШАСЯ, И ПА́КИ ПРИШЕ́ДШИМ СА́М ОТВЕЩАВА́ШЕ. ИУ́ДЕ ЖЕ СОТВО́РШУ СЛОЖЕ́НИЕ, ХРИСТО́С ГЛАГО́ЛЕТ: ДРУ́ЖЕ, НА НЕ́МЖЕ ЕСИ́, СИ́РЕЧЬ, НА НЕ́ЖЕ ПРИШЕ́Л ЕСИ́ ИУ́ДО, БЛА́ГОВРЕ́МЕННО Е́СТЬ. И ПА́КИ ГЛАГО́ЛЕТ: Я́КО НА РАЗБО́ЙНИКА ЛИ ИЗЫДО́СТЕ СО ОРУ́ЖИЕМ И ДРЕВЕСЫ́ Я́ТИ МЯ́? В НОЩИ́ ЖЕ ПРИИДО́ША, ДА НЕ НЕ́КАЯ МОЛВА́ ОТ НАРО́ДА БУ́ДЕТ. ТОГДА́ ТЕ́ПЛЕЙШИЙ ПЕ́ТР ИЗВЛЕ́К НО́Ж, ОТ ВЕ́ЧЕРИ БО БЯ́ХУ К СИЦЕВЫМ УГОТО́ВЛЕНИ, АРХИЕРЕ́ЕВА РАБА́ МА́ЛХА И́МЕНЕМ ПОРАЗИ́В, ДЕСНО́Е У́ХО ОТСЕЧЕ́. ВЕ́ДЯШЕ ЖЕ ИИСУ́С, Я́КО АРХИЕРЕ́Е РЕКУ́Т: НЕ ДО́БРЕ ЗАКО́Н СЛЫ́ШАШЕ И УЧА́ШЕ: ВОЗБРАНЯ́ЕТ У́БО ПЕТРУ́ ХРИСТО́С, Я́КО НЕ ДОБРО́ Е́СТЬ ПОСЛУ́ШНИКУ СУ́ЩУ ДУ́ХО́ВНАГО МУ́ЖА, МЕЧА́ УПОТРЕБЛЯ́ТИ: МА́ЛХОВО ЖЕ У́ХО ИСЦЕЛЯ́ЕТ. Е́МШЕ ЖЕ У́БО ИИСУ́СА, СВЯ́ЗАНА ПРИВО́ДЯТ НА ДВО́Р АРХИЕРЕ́А А́ННЫ, И́ЖЕ БЕ́ ТЕ́СТЬ КАИА́ФЫ: ТА́МО БО БЯ́ХУ ВСИ́ СО́БРАНИ НА ХРИСТА́ ГЛАСЯ́ЩИИ, ФАРИСЕ́Е И КНИ́ЖНИЦЫ. ЗДЕ́ Я́ЖЕ НА ПЕТРА́ ОТ ОТРОКОВИ́ЦЫ, ОТВЕРЖЕ́НИЕ ЕГО́ БЫВА́ЕТ, И НО́ЩИ ПОСРЕДЕ́ ИЖДИ́ВШЕЙСЯ, ПЕ́ТЕЛЬ ВОЗГЛАСИ́ ТРЕ́ТИЕ: О́Н ЖЕ ПОМЯНУ́В ВОСПЛА́КАСЯ ГО́РЬКО. И ВРЕ́МЕНИ УЖЕ́ КО У́ТРУ ПРИШЕ́ДШУ, ОТ А́ННЫ КО АРХИЕРЕ́Ю КАИА́ФЕ ХРИСТА́ ПРИВО́ДЯТ, ИДЕ́ЖЕ И ОПЛЕВА́НИЕ ПРИЯ́Т, И ЛЖЕСВИДЕ́ТЕЛИ ВОЗЗВА́НИ БЫ́ША: И ОЗАРЯ́ЮЩУ ДНЮ́ К ПИЛА́ТУ ЕГО́ ПОСЫЛА́ЕТ КАИА́ФА. ПРИВЕ́ДШИИ ЖЕ ЕГО́, ГЛАГО́ЛЕТ, НЕ ВНИДО́ША В ПРЕТО́Р, ДА НЕ ОСКВЕРНЯ́ТСЯ, НО ДА ЯДЯ́Т ПА́СХУ. СОБИРА́ЮТСЯ У́БО, Я́КО БЕЗЗАКО́ННО НЕ́ГЛИ АРХИЕРЕ́И И ФАРИСЕ́И ТОГДА́ СОДЕ́ЯША ПРЕЛОЖИ́ВШЕ ПА́СХУ, Я́КОЖЕ ГЛАГО́ЛЕТ БО́ЖЕ́СТВЕННЫЙ ЗЛАТОУ́СТ: В НО́ЩЬ БО О́НУ ПОДОБА́ШЕ И́М ТУ́Ю Я́СТИ, НО ХРИСТО́ВА РА́ДИ УБИ́ЙСТВА ПРЕЛОЖИ́ША. А Я́КО ТОГДА́ ДО́ЛЖНО БЯ́ШЕ И́М Я́СТИ Ю́, ЯВИ́ ХРИСТО́С, ПРЕ́ЖДЕ ВЕ́ЧЕРЮ НО́ЩИЮ ЯДЫ́Й, ТА́ЖЕ ТАЙНОНАУЧИ́В СОВЕРШЕ́ННЫМ: ИЛИ́ Я́КО В ЗАКО́ННОМ О́БРАЗЕ ПОДОБА́ШЕ, Я́КОЖЕ РЕЧЕ́НО БЫ́СТЬ, И И́СТИНЕ БЫ́ТИ: ИОА́НН БО ПРЕ́ЖДЕ ПРА́ЗДНИКА ГЛАГО́ЛЕТ ПА́СХИ. СИ́Х РА́ДИ ВСЕ́Х БЫ́ВШИХ В ЧЕТВЕРТО́К, И НО́ЩЬ ЕГО́ ТОГДА́ШНУЮ И МЫ́ ПРА́ЗДНУЕМ, ПОМИНА́НИЕ СТРА́ШНЫХ И НЕИЗРЕЧЕ́ННЫХ ДЕ́Л О́НЫХ И ДЕЯ́НИЙ СО СТРА́ХОМ ТВОРЯ́ЩЕ. НЕИЗРЕЧЕ́ННЫМ ТВОИ́М БЛА́ГОУТРО́БИЕМ ХРИСТЕ́ БО́ЖЕ НА́Ш, ПОМИ́ЛУЙ НА́С, АМИ́НЬ. ПЕ́СНЬ 7. [О] ИРМО́С: О́ТРОЦЫ В ВАВИЛО́НЕ ПЕ́ЩНАГО ПЛА́МЕНЕ НЕ УБОЯ́ШАСЯ, НО ПОСРЕДЕ́ ПЛА́МЕНЕ ВВЕ́РЖЕНИ, ОРОША́ЕМИ ПОЯ́ХУ: БЛА́ГОСЛОВЕ́Н ЕСИ́ ГО́СПОДИ БО́ЖЕ ОТЕ́Ц НА́ШИХ. [Н] ПОМАВА́Я ГЛАВО́Ю ИУ́ДА ЗЛАЯ ПРЕДЗРЕ́В ПОДВИ́ЖЕ, БЛА́ГОВРЕ́МЕНИЕ ИСКИ́Й ПРЕДА́ТИ СУДИЮ́ НА ОСУЖДЕ́НИЕ, И́ЖЕ ВСЕ́Х Е́СТЬ ГОСПО́ДЬ И БО́Г ОТЕ́Ц НА́ШИХ. [В] ВА́М ХРИСТО́С ДРУГО́М ВОПИЯ́ШЕ: ЕДИ́Н ПРЕДА́СТ МЯ́, ВЕСЕ́ЛИЯ ЗАБЫ́ВШЕ, СКО́РБИЮ И СТРА́ХОМ ОДЕРЖИ́МИ БЯ́ХУ: КТО́ СЕ́Й, СКАЖИ́, ГЛАГО́ЛЮЩЕ, БО́ЖЕ ОТЕ́Ц НА́ШИХ? [М] И́ЖЕ СО МНО́Ю РУ́КУ СВОЮ́ В СОЛИ́ЛО ВЛОЖИ́Т ДЕ́РЗОСТИЮ, ТОМУ́ ОБА́ЧЕ ДОБРО́ БЫ ВРАТА́ ЖИТИЯ́ ПРОЙТИ́ НИКОГДА́ЖЕ: СЕГО́, И́ЖЕ БЕ́ ПРЕДА́ТЕЛЬ, ЯВЛЯ́ШЕ БО́Г ОТЕ́Ц НА́ШИХ. ПЕ́СНЬ 8. [Н] ИРМО́С: ЗА ЗАКО́НЫ ОТЕ́ЧЕСКИЯ БЛА́ЖЕ́ННИИ В ВАВИЛО́НЕ Ю́НОШИ ПРЕДБЕ́ДСТВУЮЩЕ, ЦАРЮ́ЮЩАГО ОПЛЕВА́ША ПОВЕЛЕ́НИЕ БЕЗУ́МНОЕ, И СОВОКУ́ПЛЕНИ И́МЖЕ НЕ СВАРИ́ШАСЯ ОГНЕ́М, ДЕРЖА́ВСТВУЮЩЕМУ ДОСТО́ЙНУЮ ВОСПЕВА́ХУ ПЕ́СНЬ: ГО́СПОДА ПО́ЙТЕ ДЕЛА́, И ПРЕВОЗНОСИ́ТЕ ВО ВСЯ ВЕ́КИ. [О] СООБЕ́ДНИЦЫ БЛА́ЖЕ́ННИИ, В СИО́НЕ СЛО́ВОМ ПРЕТЕРПЕ́ВШЕ АПО́СТОЛИ ПОСЛЕ́ДОВАХУ ПА́СТЫРЮ, Я́КО А́ГНЦЫ, И СОВОКУ́ПЛЕНИ, ЕГО́ЖЕ НЕ РАЗЛУЧИ́ШАСЯ ХРИСТА́, БО́ЖЕ́СТВЕННЫМ СЛО́ВОМ ПИТА́ЕМИ, БЛА́ГОДА́РСТВЕННО ВОПИЯ́ХУ: ГО́СПОДА ПО́ЙТЕ ДЕЛА́, И ПРЕВОЗНОСИ́ТЕ ВО ВСЯ ВЕ́КИ. [Н] ЗАКО́ННЫЯ ДРУ́ЖБЫ ЗЛОИМЕНИ́ТЫЙ ИСКАРИО́Т ВО́ЛЕЮ ЗАБЫ́В, Я́ЖЕ НО́ЗЕ УМЫ́, УГОТО́ВИ НА ПРЕДА́НИЕ: И ТВО́Й ЯДЫ́Й ХЛЕ́Б, ТЕ́ЛО БО́ЖЕ́СТВЕННОЕ, ВОЗДВИ́ЖЕ КО́В НА ТЯ́ ХРИСТЕ́, И ВОПИ́ТИ НЕ РАЗУМЕ́: ГО́СПОДА ПО́ЙТЕ ДЕЛА́, И ПРЕВОЗНОСИ́ТЕ ВО ВСЯ ВЕ́КИ. [Е] ПРИИМА́ШЕ РЕШИ́ТЕЛЬНОЕ ГРЕХА́ ТЕ́ЛО БЕЗСО́ВЕСТНЫЙ, И КРО́ВЬ ИЗЛИВА́ЕМУЮ ЗА МИ́Р БО́ЖЕ́СТВЕННУЮ, НО НЕ СТЫДЯ́ШЕСЯ ПИЯ́, Ю́ЖЕ ПРОДАЯ́ШЕ НА ЦЕНЕ́, О ЗЛО́БЕ ЖЕ НЕ НЕГОДОВА́, И ВОПИ́ТИ НЕ РАЗУМЕ́: ГО́СПОДА ПО́ЙТЕ ДЕЛА́, И ПРЕВОЗНОСИ́ТЕ ВО ВСЯ ВЕ́КИ. ПЕ́СНЬ 9. [КС] ИРМО́С: СТРА́НСТВИЯ ВЛАДЫ́ЧНЯ, И БЕЗСМЕ́РТНЫЯ ТРАПЕ́ЗЫ НА ГО́РНЕМ МЕ́СТЕ, ВЫСО́КИМИ УМЫ́, ВЕ́РНИИ ПРИИДИ́ТЕ НАСЛАДИ́МСЯ, ВОЗШЕ́ДША СЛО́ВА, ОТ СЛО́ВА НАУЧИ́ВШЕСЯ, ЕГО́ЖЕ ВЕЛИЧА́ЕМ. [А] ИДИ́ТЕ, УЧЕНИ́КО́М СЛО́ВО РЕЧЕ́, ПА́СХУ НА ГО́РНИЧНОМ МЕ́СТЕ, Е́ЮЖЕ У́М УТВЕРЖДА́ЕТСЯ, И СИЮ́ ТАЙНОВОДИ́ТЕЛЬНО УГОТО́ВИТЕ, БЕЗКВА́СНЫМ И́СТИННЫМ СЛО́ВОМ, ТВЕ́РДОЕ ЖЕ БЛА́ГОДА́ТИ ВЕЛИЧА́ЙТЕ. [Д] СОДЕ́ТЕЛЬНИЦУ ОТЕ́Ц ПРЕ́ЖДЕ ВЕК ПРЕМУ́ДРОСТЬ РАЖДА́ЕТ МЯ́, НАЧА́ТОК ПУТЕ́Й, В ДЕЛА́ СОЗДА́ НЫ́НЕ ТА́ЙНО СОВЕРША́ЕМАЯ: СЛО́ВО БО НЕСОЗДА́ННОЕ СЫ́Й ЕСТЕСТВО́М, ГЛА́СЫ ПРИСВОЯ́ЮСЯ, ЕГО́ЖЕ НЫ́НЕ ПРИЯ́Х. [О] Я́КО ЧЕЛОВЕ́К СЫ́Й СУЩЕСТВО́М, НЕ МЕЧТА́НИЕМ, СИ́ЦЕ БО́Г НРА́ВОМ ВОЗДАЯ́НИЯ, ЕСТЕСТВО́ СОЕДИНИ́ВШЕЕСЯ МНЕ́. ХРИСТА́ ЕДИ́НАГО ТЕ́М МЯ́ ЗНА́ЙТЕ, ОТ НИ́ХЖЕ, В НИ́ХЖЕ, Я́ЖЕ Е́СМЬ, СПА́СА́ЮЩА. ЕКСАПОСТИЛА́РИЙ, ТРИ́ЖДЫ. ЧЕРТО́Г ТВО́Й ВИ́ЖДУ СПА́СЕ МО́Й, УКРАШЕ́ННЫЙ, И ОДЕ́ЖДЫ НЕ И́МАМ ДА ВНИ́ДУ ВО́НЬ: ПРОСВЕТИ́ ОДЕЯ́НИЕ ДУШИ́ МОЕЯ́ СВЕТОДА́ВЧЕ, И СПА́СИ́ МЯ. НА ХВАЛИ́ТЕХ ПОСТА́ВИМ СТИХИ́ 4, И ПОЕ́М СТИХИРЫ САМОГЛА́СНЫ, ГЛА́С 2: СТЕКА́ЕТСЯ ПРО́ЧЕЕ СОБО́РИЩЕ ИУДЕ́ЙСКОЕ, ДА СОДЕ́ТЕЛЯ И ЗИЖДИ́ТЕЛЯ ВСЯ́ЧЕСКИХ ПИЛА́ТУ ПРЕДА́СТ: О БЕЗЗАКО́ННЫХ, О НЕВЕ́РНЫХ! Я́КО ГРЯДУ́ЩАГО СУДИ́ТИ ЖИВЫМ И МЕ́РТВЫМ, НА СУ́Д ГОТО́ВЯТ: ИСЦЕЛЯ́ЮЩАГО СТРА́СТИ, КО СТРА́СТЕ́М УГОТОВЛЯ́ЮТ. ГО́СПОДИ ДОЛГОТЕРПЕЛИ́ВЕ, ВЕ́ЛИЯ ТВОЯ́ МИ́ЛОСТЬ, СЛА́ВА ТЕБЕ́. ИУ́ДА БЕЗЗАКО́ННЫЙ, ГО́СПОДИ, ОМОЧИ́ВЫЙ НА ВЕ́ЧЕРИ РУ́КУ В СОЛИ́ЛЕ С ТОБО́Ю, ПРОСТРЕ́ К БЕЗЗАКО́ННЫМ РУ́ЦЕ ПРИЯ́ТИ СРЕ́БРЕНИКИ, И МИРА УМЫ́СЛИВЫЙ ЦЕ́НУ, ТЕБЕ́ БЕЗЦЕ́ННАГО НЕ УБОЯ́СЯ ПРОДА́ТИ: НО́ЗЕ ПРОСТРЫ́Й ВО Е́ЖЕ УМЫ́ТИ, ВЛАДЫ́КУ ОБЛОБЫЗА́ ЛЬСТИ́ВНО, ВО Е́ЖЕ ПРЕДА́ТИ БЕЗЗАКО́ННЫМ: ЛИ́КА ЖЕ АПО́СТОЛЬСКАГО ОТВЕ́РГСЯ, И ТРИ́ДЕСЯТЬ ПОВЕ́РГ СРЕ́БРЕНИКИ, ТВОЕГО́ ТРИДНЕ́ВНАГО ВОСКРЕ́СНИЯ НЕ ВЕ́ДЕ, И́МЖЕ ПОМИ́ЛУЙ НА́С. ИУ́ДА ПРЕДА́ТЕЛЬ ЛЬСТИ́В СЫ́Й, ЛЬСТИ́ВНЫМ ЛОБЗА́НИЕМ ПРЕДАДЕ́ СПА́СА ГО́СПОДА, И ВЛАДЫ́КУ ВСЕ́Х, Я́КО РАБА́ ПРОДАДЕ́ ИУДЕ́ОМ: Я́КО ОВЧА́ НА ЗАКОЛЕ́НИЕ, ТА́КО ПОСЛЕ́ДОВАШЕ А́ГНЕЦ БО́ЖИЙ, СЫ́Н О́ТЧИЙ, ЕДИ́Н МНОГОМИ́ЛОСТИВЫЙ. ИУ́ДА РА́Б И ЛЬСТЕ́Ц, УЧЕНИ́К И НАВЕ́ТНИК, ДРУ́Г И ДИА́ВОЛ ОТ ДЕ́Л ЯВИ́СЯ: ПОСЛЕ́ДОВАШЕ БО УЧИТЛЮ, И НА НЕГО́ ПОУЧА́ШЕСЯ ПРЕДА́НИЮ, ГЛАГО́ЛАШЕ В СЕБЕ́: ПРЕДА́М ТОГО́, И ПРИОБРЯ́ЩУ СОБРАННАЯ ИМЕНИЯ ИСКА́ШЕ ЖЕ И МИРУ ПРО́ДАНУ БЫ́ТИ, И ИИСУ́СА ЛЕ́СТИЮ Я́ТИ. ОТДАДЕ́ ЦЕЛОВА́НИЕ, ПРЕДАДЕ́ ХРИСТА́: И Я́КО ОВЧА́ НА ЗАКОЛЕ́НИЕ, СИ́ЦЕ ПОСЛЕ́ДОВАШЕ ЕДИ́Н БЛА́ГОУТРО́БНЫЙ И ЧЕЛОВЕКОЛЮ́БЕЦ. СЛА́ВА, И НЫ́НЕ, ГЛА́С ТО́ЙЖЕ: ЕГО́ЖЕ ПРОПОВЕ́ДА А́ГНЦА ИСА́ИА, ГРЯДЕ́Т НА ЗАКОЛЕ́НИЕ ВО́ЛЬНОЕ, И ПЛЕЩИ́ ДАЕ́Т НА РАНЫ, ЛАНИТЫ НА ЗАУШЕ́НИЯ, ЛИЦА́ ЖЕ НЕ ОТВРАТИ́ ОТ СРАМОТЫ́ ЗАПЛЕВА́НИЙ, СМЕ́РТИЮ ЖЕ БЕЗОБРА́ЗНОЮ ОСУЖДА́ЕТСЯ. ВСЯ БЕЗГРЕ́ШНЫЙ ВО́ЛЕЮ ПРИЕ́МЛЕТ, ДА ВСЕМ ДА́РУЕТ ИЗ МЕ́РТВЫХ ВОСКРЕСЕ́НИЕ. НА СТИХО́ВНЕ СТИХИРЫ САМОГЛА́СНЫ, ГЛА́С 8: ДНЕ́СЬ Е́ЖЕ НА ХРИСТА́ ЛУКА́ВОЕ СОБРА́СЯ СОБО́РИЩЕ, И НА НЕГО́ ТЩЕ́ТНАЯ СОВЕ́ТОВАШЕ, ПРЕДА́ТИ ПИЛА́ТУ НА СМЕ́РТЬ НЕПОВИ́ННАГО. ДНЕ́СЬ ИМЕ́НИЕМ УДАВЛЕ́НИЕ ИУ́ДА СЕБЕ́ ОБЛАГА́ЕТ, И ЛИША́ЕТСЯ ОБОЮ́ДУ ЖИ́ЗНИ ПРИВРЕ́МЕННЫЯ И БО́ЖЕ́СТВЕННЫЯ. ДНЕ́СЬ КАИА́ФА НЕВО́ЛЕЮ ПРОРО́ЧЕСТВУЕТ: У́НЕ, ГЛАГО́ЛЯ, ЕДИ́НОМУ УМРЕ́ТИ ЗА ЛЮ́ДИ. ПРИИ́ДЕ БО ЗА ГРЕХИ́ НА́ША ПОСТРАДА́ТИ, ДА НА́С СВОБОДИ́Т ОТ РАБО́ТЫ ВРА́ЖИЯ, Я́КО БЛА́Г И ЧЕЛОВЕКОЛЮ́БЕЦ. СТИ́Х: ЯДЫ́Й ХЛЕ́БЫ МОЯ, ВОЗВЕЛИ́ЧИ НА МЯ́ ЗАПИНА́НИЕ. ДНЕ́СЬ ИУ́ДА НИЩЕЛЮ́БИЯ СОКРЫВА́ЕТ ЛИЦЕ́, И ЛИХОИ́МСТВА ОТКРЫВА́ЕТ ЗРА́К: НЕ КТОМУ́ О НИ́ЩИХ ПЕЧЕ́ТСЯ, НЕ КТОМУ́ МИРО ПРОДАЕ́Т ГРЕ́ШНЫЯ, НО НЕБЕ́СНОЕ МИРО, И ОТ НЕГО́ УСВОЯ́ЕТ СРЕ́БРЕННИКИ. ТЕЧЕ́Т КО ИУДЕ́ОМ, ГЛАГО́ЛЕТ БЕЗЗАКО́ННЫМ: ЧТО́ МИ ХО́ЩЕТЕ ДА́ТИ, И А́З ВА́М ПРЕДА́М ЕГО́? О СРЕБРОЛЮ́БИЯ ПРЕДА́ТЕЛЯ! УДОБОПРОДА́ТЕЛЬНУЮ ТВОРИ́Т КУ́ПЛЮ, К ВО́ЛЕ КУПУ́ЮЩИХ, НЕПРОДАЕ́МАГО КУ́ПЛЮ ТВОРИ́Т, НЕ СКУ́П ЯВЛЯ́ЕТСЯ К ЦЕНЕ́, НО Я́КО РАБА́ БЕЖА́ЩАГО ПРОДАЕ́Т: ОБЫ́ЧАЙ БО КРА́ДУЩИМ МЕТА́ТИ ЧЕСТНАЯ. НЫ́НЕ ЖЕ ПОВЕ́РЖЕ СВЯ́ТАЯ ПСО́М УЧЕНИ́К, БЕСОВА́НИЕ БО СРЕБРОЛЮ́БИЯ, НА СВОЕГО́ ВЛАДЫ́КУ НЕИ́СТОВИТИСЯ СОТВОРИ́ ЕГО́. ЕГО́ЖЕ ИСКУШЕ́НИЯ БЕЖИ́М, ЗОВУ́ЩЕ: ДОЛГОТЕРПЕЛИ́ВЕ ГО́СПОДИ, СЛА́ВА ТЕБЕ́. СТИ́Х: ИСХОЖДА́ШЕ ВО́Н, И ГЛАГО́ЛАШЕ ВКУ́ПЕ. НРА́В ТВО́Й ЛЬСТИ́ ИСПОЛНЯ́ЕТСЯ, БЕЗЗАКО́ННЫЙ ИУ́ДО: НЕДУ́ГУЯ БО СРЕБРОЛЮ́БИЕМ, ПРИОБРЕ́Л ЕСИ́ ЧЕЛОВЕКОНЕНАВИДЕ́НИЕ. А́ЩЕ БО БОГА́ТСТВО ЛЮБИ́Л ЕСИ́, ПОЧТО́ КО УЧА́ЩЕМУ О НИЩЕТЕ́ ПРИШЕ́Л ЕСИ́? А́ЩЕ ЖЕ И ЛЮБИ́Л ЕСИ́, ВСКУ́Ю ПРО́ДАЛ ЕСИ́ БЕЗЦЕ́ННАГО, ПРЕДА́В НА УБИЕ́НИЕ? УЖАСНИ́СЯ СО́ЛНЦЕ, ВОЗСТЕНИ́ ЗЕМЛЕ́, И ДВИ́ЖАЩИСЯ ВОЗОПИ́Й: НЕЗЛО́БИВЕ ГО́СПОДИ СЛА́ВА ТЕБЕ́. СТИ́Х: СЛО́ВО ЗАКОНОПРЕСТУ́ПНОЕ ВОЗЛОЖИ́ША НА МЯ́. ДА НИКТО́ЖЕ, О ВЕ́РНИИ, ВЛАДЫ́ЧНИЯ ВЕ́ЧЕРИ ТАЙНОНЕНАУЧЕ́Н, НИКТО́ЖЕ ОТНЮ́Д Я́КО ИУ́ДА ЛЬСТИ́ВНО ДА ПРИСТУ́ПИТ К ТРАПЕ́ЗЕ: О́Н БО УКРУ́Х ПРИЕ́М, НА ХЛЕ́БА УКЛОНИ́СЯ. О́БРАЗОМ У́БО СЫ́Й УЧЕНИ́К, ВЕ́ЩИЮ ЖЕ СЫ́Й УБИ́ЙЦА. СО ИУДЕ́И У́БО ВЕСЕЛЯ́СЯ, СО АПО́СТОЛЫ ЖЕ ВОДВОРЯ́ЯСЯ: НЕНАВИ́ДЯ ЛОБЫЗА́ШЕ, ЛОБЫЗА́Я ЖЕ ПРОДАВА́ШЕ ИСКУПИ́ВШАГО НА́С КЛЯ́ТВЫ, БО́ГА И СПА́СА ДУ́Ш НА́ШИХ. СЛА́ВА, ГЛА́С ТО́ЙЖЕ: НРА́В ТВО́Й ЛЬСТИ́: И НЫ́НЕ, ГЛА́С 5: ТАЙНОВО́ДСТВУЯ ТВОЯ ГО́СПОДИ УЧЕНИКИ́, УЧИ́Л ЕСИ́ ГЛАГО́ЛЯ: О ДРУ́ЗИ, ЗРИ́ТЕ, ДА НИКИ́ЙЖЕ СТРА́Х ВА́С РАЗЛУЧИ́Т ОТ МЕНЕ́: А́ЩЕ БО И СТРАЖДУ́, НО ЗА МИ́Р. НЕ БЛАЗНИ́ТЕСЯ У́БО О МНЕ́: НЕ ПРИИДО́Х БО, ДА ПОСЛУ́ЖАТ МИ́, НО ПОСЛУЖИ́ТИ, И ПОЛОЖИ́ТИ ДУ́ШУ МОЮ́ ИЗБАВЛЕ́НИЕ ЗА МИ́Р. А́ЩЕ У́БО ВЫ́ ДРУ́ЗИ МОИ́ ЕСТЕ́, МЕНЕ́ ПОДРАЖА́ЙТЕ: ХОТЯ́Й ПЕ́РВЫЙ БЫ́ТИ, ДА БУ́ДЕТ ПОСЛЕ́ДНИЙ, ВЛАДЫ́КА Я́КО СЛУЖИ́ТЕЛЬ. ПРЕБУ́ДИТЕ ВО МНЕ́, ДА ГРО́ЗД ПРИНЕСЕТЕ́: А́З БО Е́СМЬ ЛОЗА́ ЖИВО́ТНАЯ. БЛА́ГО Е́СТЬ ИСПОВЕ́ДАТИСЯ ГО́СПОДЕВИ: СОВОКУПЛЯ́ЕМ И ЧА́С ПЕ́РВЫЙ, В НЕ́МЖЕ ГЛАГО́ЛЕМ И ТРОПА́РЬ ПРОРО́ЧЕСТВА, ГЛА́С 3: ЗАУШЕ́ННЫЙ ЗА РО́Д ЧЕЛОВЕ́ЧЕСКИЙ, И НЕ ПРОГНЕ́ВАВЫЙСЯ СВОБОДИ́ ОТ ИСТЛЕ́НИЯ ЖИВО́Т НА́Ш ГО́СПОДИ, И СПА́СИ́ НА́С. СЛА́ВА, И НЫ́НЕ, ТО́ЙЖЕ. ПРОКИ́МЕН, ГЛА́С 1: ДА РАЗУМЕ́ЮТ ЯЗЫ́ЦЫ, Я́КО И́МЯ ТЕБЕ́ ГОСПО́ДЬ. СТИ́Х: БО́ЖЕ, КТО́ УПОДО́БИТСЯ ТЕБЕ́? ПРОРО́ЧЕСТВА ИЕРЕМИ́ИНА ЧТЕ́НИЕ. [ГЛАВА́ 11, СТ. 18-23: ГЛАВА́ 12, СТ. 1-15.] ГО́СПОДИ, СКАЖИ́ МИ, И УРАЗУМЕ́Ю: ТОГДА́ ВИ́ДЕХ НАЧИНАНИЯ И́Х. А́З ЖЕ Я́КО А́ГНЯ НЕЗЛО́БИВОЕ ВЕДО́МОЕ НА ЗАКОЛЕ́НИЕ НЕ РАЗУМЕ́Х, Я́КО НА МЯ́ ПОМЫ́СЛИША ПО́МЫСЛ ЛУКА́ВЫЙ, ГЛАГО́ЛЮЩЕ: ПРИИДИ́ТЕ И ВЛОЖИ́М ДРЕ́ВО В ХЛЕ́Б ЕГО́, И ИСТРЕБИ́М ЕГО́ ОТ ЗЕМЛИ́ ЖИВУ́ЩИХ, И И́МЯ ЕГО́ ДА НЕ ПОМЯНЕ́ТСЯ КТОМУ́. ГОСПО́ДЬ САВАО́Ф, СУДЯ́Й ПРА́ВЕДНО, ИСПЫТУ́ЯЙ СЕРДЦА́ И УТРО́БЫ, ДА ВИ́ЖДУ МЩЕ́НИЕ ТВОЕ́ НА НИ́Х, Я́КО К ТЕБЕ́ ОТКРЫ́Х ОПРАВДА́НИЕ МОЕ́. СЕГО́ РА́ДИ СИЯ ГЛАГО́ЛЕТ ГОСПО́ДЬ НА МУ́ЖЫ АНАФО́ФСКИ И́ЩУЩИЯ ДУШИ́ МОЕЯ́, ГЛАГО́ЛЮЩИЯ: ДА НЕ ПРОРО́ЧЕСТВУЕШИ О И́МЕНИ ГОСПО́ДНИ: А́ЩЕ ЛИ ЖЕ НИ́, У́МРЕШИ В РУКА́Х НА́ШИХ. СЕГО́ РА́ДИ СИЯ ГЛАГО́ЛЕТ ГОСПО́ДЬ СИ́Л: СЕ́ А́З ПОСЕЩУ́ НА НИ́Х: Ю́НОШИ И́Х МЕЧЕ́М У́МРУТ, И СЫ́НОВЕ И́Х И ДЩЕ́РИ И́Х СКОНЧА́ЮТСЯ ГЛА́ДОМ: И ОСТА́НКА НЕ БУ́ДЕТ ОТ НИ́Х, НАВЕДУ́ БО ЗЛАЯ НА ЖИВУ́ЩИЯ ВО АНАФО́ФЕ, В ЛЕ́ТО ПОСЕЩЕ́НИЯ И́Х. ПРА́ВЕДЕН ЕСИ́ ГО́СПОДИ, Я́КО ОТВЕЩА́Ю К ТЕБЕ́, ОБА́ЧЕ СУДЬБЫ ВОЗГЛАГО́ЛЮ К ТЕБЕ́: ЧТО́ Я́КО ПУ́ТЬ НЕЧЕСТИ́ВЫХ СПЕ́ЕТСЯ? УГОБЗИ́ШАСЯ ВСИ́ ТВОРЯ́ЩИИ БЕЗЗАКО́НИЯ? НАСАДИ́Л ЕСИ́ И́Х, И УКОРЕНИ́ШАСЯ: ЧАДА СОТВОРИ́ША, И СОТВОРИ́ША ПЛО́Д: БЛИ́З ЕСИ́ ТЫ́ У́СТ И́Х, ДАЛЕ́ЧЕ ЖЕ ОТ УТРО́Б И́Х. И ТЫ́, ГО́СПОДИ, РАЗУМЕ́ЕШИ МЯ́, ВИ́ДЕЛ МЯ́ ЕСИ́, И ИСКУСИ́Л ЕСИ́ СЕ́РДЦЕ МОЕ́ ПРЕД ТОБО́Ю, СОБЕРИ́ И́Х Я́КО О́ВЦЫ НА ЗАКОЛЕ́НИЕ, И ОЧИ́СТИ И́Х В ДЕ́НЬ ЗАКОЛЕ́НИЯ И́Х. ДОКО́ЛЕ ПЛА́КАТИ И́МАТЬ ЗЕМЛЯ́, И ТРАВА́ ВСЯ СЕ́ЛЬНАЯ И́ЗСХНЕТ ОТ ЗЛО́БЫ ЖИВУ́ЩИХ НА НЕ́Й? ПОГИБО́ША СКО́ТИ И ПТИЦЫ, Я́КО РЕКО́ША: НЕ У́ЗРИТ БО́Г ПУТЕ́Й НА́ШИХ. НО́ЗИ ТВОИ́ ТЕКУ́Т, И РАЗСЛАБЛЯ́ЮТ ТЯ́. ИДИ́ТЕ, СОБЕРИ́ТЕ ВСЯ ЗВЕ́РИ СЕ́ЛЬНЫЯ, И ДА ПРИИ́ДУТ СНЕ́СТИ Е́. ПА́СТЫРИЕ МНО́ЗИ РАСТЛИ́ША ВИНОГРА́Д МО́Й, ОСКВЕРНИ́ША ЧА́СТЬ МОЮ́, ДА́ША ЧА́СТЬ ЖЕЛА́ЕМУЮ МОЮ́ В ПУСТЫ́НЮ НЕПРОХО́ДНУЮ. ПОЛОЖИ́ША В ПОТРЕБЛЕ́НИЕ ПА́ГУБЫ. Я́КО СИЯ ГЛАГО́ЛЕТ ГОСПО́ДЬ О ВСЕ́Х СОСЕДЕ́Х ЛУКА́ВЫХ, ПРИКАСА́ЮЩИХСЯ НАСЛЕ́ДИЮ МОЕМУ́, Е́ЖЕ РАЗДЕЛИ́Х ЛЮ́ДЕМ МОИМ ИЗРА́ИЛЮ: СЕ́ А́З ИСТО́РГНУ И́Х ОТ ЗЕМЛИ́ И́Х, И ДО́М ИУ́ДИН ИЗВЕ́РГНУ ОТ СРЕДЫ́ И́Х. И БУ́ДЕТ ЕГДА́ ИСТО́РГНУ И́Х, ОБРАЩУ́СЯ И ПОМИ́ЛУЮ И́Х, И ВСЕЛЮ́ И́Х, КОГО́ЖДО В ДОСТОЯ́НИЕ СВОЕ́, И КОГО́ЖДО В ЗЕ́МЛЮ СВОЮ́. ПРОКИ́МЕН, ГЛА́С 8: ПОМОЛИ́ТЕСЯ И ВОЗДАДИ́ТЕ ГО́СПОДЕВИ БО́ГУ НА́ШЕМУ. СТИ́Х: ВЕ́ДОМ ВО ИУДЕ́И БО́Г, ВО ИЗРА́ИЛИ ВЕ́ЛИЕ И́МЯ ЕГО́. ПОДОБА́ЕТ ВЕ́ДАТИ, Я́КО ЛИТИ́И ЗА УПОКО́Й В ПРИТВО́РЕ НЕ БЫВА́ЕТ ДО НЕДЕ́ЛИ ФОМИНЫ́. ПРО́ЧИЯ ЖЕ ЧАСЫ́ ПОЮ́ТСЯ ТРИПСА́ЛМНЫ, ПРО́СТО. ВО СВЯ́ТЫ́Й И ВЕЛИ́КИЙ ЧЕТВЕРТО́К ВЕ́ЧЕРА, ВО СВЕТИ́ЛЬНИЧНОЕ, КЛЕ́ПЛЕТ ВО 8 ЧА́С, И БЛА́ГОСЛОВИ́ВШУ АРХИЕРЕ́Ю, ИЛИ́ СВЯ́ЩЕ́ННИКУ, НАЧИНА́ЕМ ВЕЧЕ́РНЮ: ПРИИДИ́ТЕ ПОКЛОНИ́МСЯ: И ПРЕДНАЧИНА́ТЕЛЬНЫЙ ПСАЛО́М. БЫВА́ЕТ ЕКТЕНИА́ ОТ СВЯ́ЩЕ́ННИКА. ТА́ЖЕ, ГО́СПОДИ ВОЗЗВА́Х, НА ГЛА́С 2, ПОСТАВЛЯ́ЕМ СТИХО́В 10. СВЯ́ЩЕ́ННИК ЖЕ ИЗМЕНЯ́ЯЙ СВЯ́ЩЕ́ННИЧЕСКУЮ ОДЕ́ЖДУ, ИСХО́ДИТ, И КАДИ́Т, И ПО Е́ЖЕ ВОЗВРАТИ́ТИСЯ, ТВОРИ́Т ПРОСКОМИ́ДИЮ. МЫ́ ЖЕ ПОЕ́М СТИХИРЫ САМОГЛА́СНЫ ДНЕ́, ГЛА́С 2, ПОВТОРЯ́ЮЩЕ Я́. СТЕКА́ЕТСЯ ПРО́ЧЕЕ СОБО́РИЩЕ ИУДЕ́ЙСКОЕ, ДА СОДЕ́ТЕЛЯ И ЗИЖДИ́ТЕЛЯ ВСЯ́ЧЕСКИХ ПИЛА́ТУ ПРЕДА́СТ. О БЕЗЗАКО́ННЫХ, О НЕВЕ́РНЫХ! Я́КО ГРЯДУ́ЩАГО СУДИ́ТИ ЖИВЫМ И МЕ́РТВЫМ, НА СУ́Д ГОТО́ВЯТ: ИСЦЕЛЯ́ЮЩАГО СТРАСТИ, КО СТРА́СТЕ́М УГОТОВЛЯ́ЮТ: ГО́СПОДИ ДОЛГОТЕРПЕЛИ́ВЕ, ВЕ́ЛИЯ ТВОЯ́ МИ́ЛОСТЬ, СЛА́ВА ТЕБЕ́. ИУ́ДА БЕЗЗАКО́ННЫЙ, ОМОЧИ́ВЫЙ НА ВЕ́ЧЕРИ РУ́КУ В СОЛИ́ЛЕ С ТОБО́Ю, ПРОСТРЕ́ К БЕЗЗАКО́ННЫМ РУ́ЦЕ ПРИЯ́ТИ СРЕ́БРЕНИКИ: И МИРА УМЫ́СЛИВЫЙ ЦЕ́НУ, ТЕБЕ́ БЕЗЦЕ́ННАГО НЕ УБОЯ́СЯ ПРОДА́ТИ: НО́ЗЕ ПРОСТРЫ́Й, ВО Е́ЖЕ УМЫ́ТИ: ВЛАДЫ́КУ ОБЛОБЫЗА́ ЛЬСТИ́ВНО, ВО Е́ЖЕ ПРЕДА́ТИ БЕЗЗАКО́ННЫМ: ЛИ́КА ЖЕ АПО́СТОЛЬСКАГО ОТВЕ́РГСЯ, И ТРИ́ДЕСЯТЬ ПОВЕ́РГ СРЕ́БРЕНИКИ, ТВОЕГО́ ТРИДНЕ́ВНАГО ВОСКРЕ́СНИЯ НЕ ВЕ́ДЕ, И́МЖЕ ПОМИ́ЛУЙ НА́С. ИУ́ДА ПРЕДА́ТЕЛЬ ЛЬСТИ́В СЫ́Й, ЛЬСТИ́ВНЫМ ЛОБЗА́НИЕМ ПРЕДАДЕ́ СПА́СА ГО́СПОДА, И ВЛАДЫ́КУ ВСЕ́Х, Я́КО РАБА́ ПРОДАДЕ́ ИУДЕ́ОМ: Я́КО ОВЧА́ НА ЗАКОЛЕ́НИЕ, ТА́КО ПОСЛЕ́ДОВАШЕ, А́ГНЕЦ БО́ЖИЙ, СЫ́Н О́ТЧИЙ, ЕДИ́Н МНОГОМИ́ЛОСТИВЫЙ. ИУ́ДА РА́Б И ЛЬСТЕ́Ц, УЧЕНИ́К И НАВЕ́ТНИК, ДРУ́Г И ДИА́ВОЛ, ОТ ДЕ́Л ЯВИ́СЯ: ПОСЛЕ́ДОВАШЕ БО УЧИ́ТЕЛЮ, И НА НЕГО́ ПОУЧА́ШЕСЯ ПРЕДА́НИЮ, ГЛАГО́ЛАШЕ В СЕБЕ́: ПРЕДА́М ТОГО́, И ПРИОБРЯ́ЩУ СО́БРАННАЯ ИМЕНИЯ: ИСКА́ШЕ ЖЕ И МИРУ ПРО́ДАНУ БЫ́ТИ, И ИИСУ́СА ЛЕ́СТИЮ Я́ТИ, ОТДАДЕ́ ЦЕЛОВА́НИЕ, ПРЕДАДЕ́ ХРИСТА́. И Я́КО ОВЧА́ НА ЗАКОЛЕ́НИЕ, СИ́ЦЕ ПОСЛЕ́ДОВАШЕ А́ГНЕЦ БО́ЖИЙ, ЕДИ́Н БЛА́ГОУТРО́БНЫЙ И ЧЕЛОВЕКОЛЮ́БЕЦ. ЕГО́ЖЕ ПРОПОВЕ́ДА А́ГНЦА ИСА́ИА, ГРЯДЕ́Т НА ЗАКОЛЕ́НИЕ ВО́ЛЬНОЕ, И ПЛЕЩИ ДАЕ́Т НА РАНЫ, ЛАНИТЫ НА ЗАУШЕ́НИЯ, ЛИЦА́ ЖЕ НЕ ОТВРАТИ́ ОТ СРАМОТЫ́ ЗАПЛЕВА́НИЙ, СМЕ́РТИЮ ЖЕ БЕЗОБРА́ЗНОЮ ОСУЖДА́ЕТСЯ: ВСЯ БЕЗГРЕ́ШНЫЙ ВО́ЛЕЮ ПРИЕ́МЛЕТ, ДА ВСЕМ ДА́РУЕТ ИЗ МЕ́РТВЫХ ВОСКРЕСЕ́НИЕ. СЛА́ВА, И НЫ́НЕ, ГЛА́С 6: РОЖДЕ́НИЕ ЕХИ́ДНОВ ВОИ́СТИННУ ИУ́ДА, Я́ДШИХ МА́ННУ В ПУСТЫ́НИ, И РО́ПЩУЩИХ НА ПИТА́ТЕЛЯ: ЕЩЕ́ БО БРА́ШНУ СУ́ЩУ ВО УСТЕ́Х И́Х, КЛЕВЕТА́ХУ НА БО́ГА НЕБЛА́ГОДА́РНИИ: И СЕ́Й ЗЛОЧЕСТИ́ВЫЙ НЕБЕ́СНЫЙ ХЛЕ́Б ВО УСТЕ́Х НОСЯ́Й, НА СПА́СА ПРЕДА́ТЕЛЬСТВО СОДЕ́ЛА. О НРА́ВА НЕСЫ́ТНАГО, И ДЕ́РЗОСТИ БЕЗЧЕЛОВЕ́ЧНЫЯ! ПИТА́ЮЩАГО ПРОДАЕ́Т, И ЕГО́ЖЕ ЛЮБЛЯ́ШЕ ВЛАДЫ́КУ, ПРЕДАЯ́ШЕ НА СМЕ́РТЬ: ВОИ́СТИННУ О́НЕХ СЫ́Н БЕЗЗАКО́ННЫЙ, И С НИ́МИ ПА́ГУБУ НАСЛЕ́ДОВА. НО ПОЩАДИ́ ГО́СПОДИ, ДУ́ШИ НА́ША ОТ ТАКОВА́ГО БЕЗЧЕЛОВЕ́ЧЕСТВА, ЕДИ́НЕ В ДОЛГОТЕРПЕ́НИИ НЕИЗРЕЧЕ́ННЫЙ. ВХО́Д СО ЕВА́НГЕЛИЕМ. СВЕ́ТЕ ТИ́ХИЙ: ПРОКИ́МЕН, ГЛА́С 1: ИЗМИ́ МЯ ГО́СПОДИ, ОТ ЧЕЛОВЕ́КА ЛУКА́ВА, ОТ МУ́ЖА НЕПРА́ВЕДНА ИЗБА́ВИ МЯ́. СТИ́Х: И́ЖЕ ПОМЫ́СЛИША НЕПРА́ВДУ В СЕ́РДЦЕ ВЕ́СЬ ДЕ́НЬ. ИСХО́ДА ЧТЕ́НИЕ. [ГЛАВА́ 19, СТ. 10-19.] РЕЧЕ́ ГОСПО́ДЬ МОИСЕ́Ю: СОШЕ́Д ЗАСВИДЕ́ТЕЛЬСТВУЙ ЛЮ́ДЕМ, И ОЧИ́СТИ Я́ ДНЕ́СЬ И У́ТРЕ: И ДА ИСПЕРУ́Т РИЗЫ. И ДА БУ́ДУТ ГОТО́ВЫ В ДЕ́НЬ ТРЕ́ТИЙ: В ТРЕ́ТИЙ БО ДЕ́НЬ СНИ́ДЕТ ГОСПО́ДЬ НА ГО́РУ СИНА́ЙСКУЮ, ПРЕД ВСЕ́МИ ЛЮДЬМИ́. И УСТРО́ИШИ ЛЮ́ДИ О́КРЕСТ, ГЛАГО́ЛЯ: ВНЕМЛИ́ТЕ СЕБЕ́ НЕ ВОСХОДИ́ТИ НА ГО́РУ, И НИЧИ́МЖЕ КОСНУ́ТИСЯ ЕЯ́: ВСЯ́К ПРИКОСНУ́ВЫЙСЯ ГОРЕ́, СМЕ́РТИЮ У́МРЕТ. НЕ КО́СНЕТСЯ Е́Й РУКА́, КА́МЕНИЕМ БО ПОБИЕ́ТСЯ, ИЛИ́ СТРЕЛО́Ю УСТРЕЛИ́ТСЯ, А́ЩЕ СКО́Т, А́ЩЕ ЧЕЛОВЕ́К, НЕ БУ́ДЕТ ЖИ́В: ЕГДА́ ЖЕ ГЛА́СИ И ТРУБЫ И О́БЛАК ОТИ́ДЕТ ОТ ГОРЫ́, СИ́И ВЗЫ́ДУТ НА ГО́РУ. СНИ́ДЕ ЖЕ МОИСЕ́Й С ГОРЫ́ К ЛЮ́ДЕМ, И ОСВЯ́ТИ́ Я́: И ИСПРА́ША РИЗЫ СВОЯ. И РЕЧЕ́ ЛЮ́ДЕМ: БУ́ДИТЕ ГОТО́ВИ, ТРИ́ ДНИ НЕ ВХОДИ́ТЕ К ЖЕНА́М. БЫ́СТЬ ЖЕ В ТРЕ́ТИЙ ДЕ́НЬ БЫ́ВШУ КО У́ТРУ, И БЫ́ША ГЛА́СИ И МО́ЛНИЯ, И О́БЛАК МРА́ЧЕН НА ГОРЕ́ СИНА́ЙСТЕЙ, ГЛА́С ТРУ́БНЫЙ ГЛАША́ШЕ ЗЕЛО́: И УБОЯ́ШАСЯ ВСИ́ ЛЮ́ДИЕ И́ЖЕ В ПОЛЦЕ́. ИЗВЕДЕ́ ЖЕ МОИСЕ́Й ЛЮ́ДИ ВО СРЕ́ТЕНИЕ БО́ГУ ИЗ ПОЛКА́, И (Л. 432 ОБ.) СТА́ША ПОД ГОРО́Ю. ГОРА́ ЖЕ СИНА́ЙСКАЯ ДЫМЯ́ШЕСЯ ВСЯ́, СХОЖДЕ́НИЯ РА́ДИ БО́ЖИЯ НА НЮ́ ВО ОГНИ́: И ВОСХОЖДА́ШЕ ДЫ́М, Я́КО ДЫ́М ПЕ́ЩНЫЙ: И УЖАСО́ШАСЯ ВСИ́ ЛЮ́ДИЕ ЗЕЛО́. БЫ́ША ЖЕ ГЛА́СИ ТРУ́БНИИ ПРОИСХОДЯ́ЩЕ КРЕ́ПЦЫ ЗЕЛО́. МОИСЕ́Й ГЛАГО́ЛАШЕ, БО́Г ЖЕ ОТВЕЩАВА́ШЕ ЕМУ́ ГЛА́СОМ. ПРОКИ́МЕН, ГЛА́С 7: ИЗМИ́ МЯ ОТ ВРАГ МОИ́Х БО́ЖЕ, И ОТ ВОСТАЮ́ЩИХ НА МЯ́ ИЗБА́ВИ МЯ́. СТИ́Х: ИЗБА́ВИ МЯ́ ОТ ДЕ́ЛАЮЩИХ БЕЗЗАКО́НИЕ. И́ОВА ЧТЕ́НИЕ. [ГЛАВА́ 38, СТ. 1-23: ГЛ. 42, СТ. 1-5]. РЕЧЕ́ ГОСПО́ДЬ И́ОВУ СКВОЗЕ́ БУ́РЮ И О́БЛАКИ: КТО́ СЕ́Й СКРЫВА́ЯЙ ОТ МЕНЕ́ СОВЕ́Т, СОДЕРЖА́Й ЖЕ ГЛАГО́ЛЫ В СЕ́РДЦЕ, МЕНЕ́ ЖЕ ЛИ МНИ́ТСЯ УТАИ́ТИ? ПРЕПОЯ́ШИ Я́КО МУ́Ж ЧРЕ́СЛА ТВОЯ: ВОПРОШУ́ ЖЕ ТЯ́, ТЫ́ ЖЕ МИ́ ОТВЕЩА́Й. ГДЕ́ БЫ́Л ЕСИ́ ЕГДА́ ОСНОВА́Х ЗЕ́МЛЮ? ВОЗВЕСТИ́ МИ, А́ЩЕ ВЕ́СИ РА́ЗУМ? КТО́ ПОЛОЖИ́ МЕРЫ ЕЯ́, А́ЩЕ ВЕ́СИ? ИЛИ́ КТО́ НАВЕДЫ́Й ВЕ́РВЬ НА НЮ́? НА ЧЕ́МЖЕ СТОЛПИ́ ЕЯ́ УТВЕРЖДЕ́НИ СУ́ТЬ? КТО́ ЖЕ Е́СТЬ ПОЛОЖИ́ВЫЙ КА́МЕНЬ КРАЕУГО́ЛЬНЫЙ НА НЕ́Й? ЕГДА́ [СОТВОРЕ́НЫ] БЫ́ША ЗВЕ́ЗДЫ, ВОСХВАЛИ́ША МЯ́ ГЛА́СОМ ВЕ́ЛИИМ ВСИ́ А́НГЕЛИ МОИ́. ЗАГРАДИ́Х ЖЕ МО́РЕ ВРАТЫ́, ЕГДА́ ИЗЛИВА́ШЕСЯ ИЗ ЧРЕ́ВА МА́ТЕРЕ СВОЕЯ́ ИСХОДЯ́ЩЕЕ. ПОЛОЖИ́Х ЖЕ ЕМУ́ О́БЛАК ВО ОДЕЯ́НИЕ, МГЛО́Ю ЖЕ ПОВИ́Х Е́: И ПОЛОЖИ́Х ЕМУ́ ПРЕДЕ́ЛЫ, ОБЛОЖИ́В ЗАТВО́РЫ И ВРАТА́. РЕ́Х ЖЕ ЕМУ́: ДО СЕГО́ ДО́ЙДЕШИ И НЕ ПРЕ́ЙДЕШИ, НО В ТЕБЕ́ СОКРУША́ТСЯ ВО́ЛНЫ ТВОЯ. ИЛИ́ ПРИ ТЕБЕ́ СОСТА́ВИХ СВЕ́Т У́ТРЕННИЙ? ДЕННИ́ЦА ЖЕ ВЕ́СТЬ ЧИ́Н СВО́Й, Я́ТИСЯ КРИ́Л ЗЕМЛИ́, ОТТРЯСТИ́ НЕЧЕСТИВЫЯ ОТ НЕЯ́. ИЛИ́ ТЫ́ БРЕ́НИЕ ВЗЕ́М ОТ ЗЕМЛИ́, СОЗДА́Л ЕСИ́ ЖИВО́ТНО, И ГЛАГО́ЛИВАГО СЕГО́ ПОСАДИ́Л ЕСИ́ НА ЗЕМЛИ́? ОТЯ́Л ЖЕ ЛИ ЕСИ́ ОТ НЕЧЕСТИ́ВЫХ СВЕ́Т? МЫ́ШЦУ ЖЕ ГО́РДЫХ СОКРУШИ́Л ЛИ ЕСИ́? ПРИШЕ́Л ЖЕ ЛИ ЕСИ́ НА ИСТО́ЧНИКИ МО́РЯ? В СЛЕДА́Х ЖЕ БЕ́ЗДНЫ ХОДИ́Л ЛИ ЕСИ́? ОТВЕРЗА́ЮТСЯ ЖЕ ЛИ ТЕБЕ́ СТРА́ХОМ ВРАТА́ СМЕ́РТНАЯ? ВРА́ТНИЦЫ ЖЕ А́ДОВЫ ВИ́ДЕВШЕ ТЯ́ УБОЯ́ШАСЯ ЛИ? НАВЫ́КЛ ЖЕ ЛИ ЕСИ́ ШИРОТЫ́ ПОДНЕБЕ́СНЫЯ, ПОВЕ́ЖДЬ У́БО МИ́, КОЛИ́КА Е́СТЬ, В КО́ЕЙ ЖЕ ЗЕМЛИ́ ВСЕЛЯ́ЕТСЯ СВЕ́Т? ТЬМЕ́ ЖЕ КО́Е Е́СТЬ МЕ́СТО? А́ЩЕ У́БО ВВЕДЕ́ШИ МЯ́ В ПРЕДЕ́ЛЫ И́Х, А́ЩЕ ЖЕ ЛИ И ВЕ́СИ СТЕЗИ́ И́Х? ВЕ́М У́БО Я́КО ТОГДА́ РОЖДЕ́Н ЕСИ́, ЧИСЛО́ ЖЕ ЛЕ́Т ТВОИ́Х МНО́ГО. ПРИШЕ́Л ЖЕ ЛИ ЕСИ́ В СОКРО́ВИЩА СНЕЖНАЯ, И СОКРО́ВИЩА ГРАДНАЯ ВИ́ДЕЛ ЛИ ЕСИ́? ПОДЛЕЖА́Т ЖЕ ЛИ ТЕБЕ́ В ЧА́С ВРАГО́В В ДЕ́НЬ БРА́НЕЙ И РА́ТИ? ОТВЕЩА́В ЖЕ И́ОВ, РЕЧЕ́ КО ГО́СПОДУ: ВЕ́М Я́КО ВСЯ МО́ЖЕШИ, НЕВОЗМО́ЖНО ЖЕ ТЕБЕ́ НИЧТО́ЖЕ. КТО́ ЕСТЬ ТАЯ́Й ОТ ТЕБЕ́ СОВЕ́Т? ЩАДЯ́Й ЖЕ СЛОВЕСА́, И ОТ ТЕБЕ́ МНИ́ТСЯ УТАИ́ТИ? КТО́ ЖЕ ВОЗВЕСТИ́Т МИ́, И́ХЖЕ НЕ ВЕ́ДЕХ, ВЕ́ЛИЯ И ДИВНАЯ, И́ХЖЕ НЕ ЗНА́Х? ПОСЛУ́ШАЙ ЖЕ МЕНЕ́ ГО́СПОДИ, ДА И А́З ВОЗГЛАГО́ЛЮ: ВОПРОШУ́ ЖЕ ТЯ́, ТЫ́ ЖЕ МЯ́ НАУЧИ́. СЛУ́ХОМ У́БО У́ХА СЛЫ́ШАХ ТЯ́ ПЕ́РВЕЕ, НЫ́НЕ ЖЕ О́КО МОЕ́ ВИ́ДЕ ТЯ́. ПРОРО́ЧЕСТВА ИСА́ИИНА ЧТЕ́НИЕ. [ГЛАВА́ 8, СТ. 4- 11.] ГОСПО́ДЬ ДАЕ́Т МНЕ́ ЯЗЫ́К НАУЧЕ́НИЯ, Е́ЖЕ РАЗУМЕ́ТИ, ЕГДА́ ПОДОБА́ЕТ РЕЩИ́ СЛО́ВО: ПОЛОЖИ́ МЯ У́ТРО У́ТРО, ПРИЛОЖИ́ МИ У́ХО, Е́ЖЕ СЛЫ́ШАТИ. И НАКАЗА́НИЕ ГОСПО́ДНЕ ОТВЕРЗА́ЕТ У́ШИ МОИ́, А́З ЖЕ НЕ ПРОТИ́ВЛЮСЯ, НИ ПРОТИВОГЛАГО́ЛЮ. ПЛЕЩИ́ МОИ́ ВДА́Х НА РАНЫ, И ЛАНИТЕ МОИ́ НА ЗАУШЕ́НИЯ, ЛИЦА́ ЖЕ МОЕГО́ НЕ ОТВРАТИ́Х ОТ СТУДА́ ЗАПЛЕВА́НИЙ. И ГОСПО́ДЬ ГОСПО́ДЬ ПОМО́ЩНИК МИ́ БЫ́СТЬ: СЕГО́ РА́ДИ НЕ УСРАМИ́ХСЯ, НО ПОЛОЖИ́Х ЛИЦЕ́ СВОЕ́ А́КИ ТВЕ́РДЫЙ КА́МЕНЬ, И РАЗУМЕ́Х, Я́КО НЕ ПОСТЫЖДУ́СЯ. ЗАНЕ́ ПРИБЛИЖА́ЕТСЯ ОПРАВДА́ВЫЙ МЯ́: КТО́ ПРЯ́ЙСЯ СО МНО́Ю? ДА СОПРОТИВОСТА́НЕТ МНЕ́ КУ́ПНО: И КТО́ СУДЯ́ЙСЯ СО МНО́Ю: ДА ПРИБЛИ́ЖИТСЯ КО МНЕ́. СЕ́ ГОСПО́ДЬ ГОСПО́ДЬ ПОМО́ЖЕТ МИ́: КТО́ ОЗЛО́БИТ МЯ́? СЕ́ ВСИ́ ВЫ́, Я́КО РИ́ЗА ОБЕТША́ЕТЕ, И Я́КО МО́ЛИЕ ИЗЪЯ́СТ ВЫ́. КТО́ В ВА́С БОЯ́ЙСЯ ГО́СПОДА? ДА ПОСЛУ́ШАЕТ ГЛА́СА О́ТРОКА ЕГО́: ХОДЯ́ЩИИ ВО ТЬМЕ́, И НЕ́СТЬ И́М СВЕ́ТА, НАДЕ́ЙТЕСЯ НА И́МЯ ГОСПО́ДНЕ, И УТВЕРДИ́ТЕСЯ О БО́ЗЕ. СЕ́ ВСИ́ ВЫ́ О́ГНЬ РАЖДИЗА́ЕТЕ, И УКРЕПЛЯ́ЕТЕ ПЛА́МЕНЬ: ХОДИ́ТЕ СВЕ́ТОМ ОГНЯ́ ВА́ШЕГО, И ПЛА́МЕНЕМ, ЕГО́ЖЕ РАЗЖЕГО́СТЕ: МЕНЕ́ РА́ДИ БЫ́ША СИЯ ВА́М, В ПЕЧА́ЛИ У́СПНЕТЕ. ТА́ЖЕ, ЕКТЕНИА́ МА́ЛАЯ. ТРИСВЯ́ТО́Е. ПРОКИ́МЕН АПО́СТОЛА, ГЛА́С 7: КНЯ́ЗИ ЛЮ́ДСТИИ СОБРА́ШАСЯ ВКУ́ПЕ НА ГО́СПОДА И НА ХРИСТА́ ЕГО́. СТИ́Х: ВСКУ́Ю ШАТА́ШАСЯ ЯЗЫ́ЦЫ, И ЛЮ́ДИЕ ПОУЧИ́ШАСЯ ТЩЕ́ТНЫМ. АПО́СТОЛ К КОРИ́НФЯНОМ, ЗАЧА́ЛО 149. БРА́ТИЕ, А́З ПРИЯ́Х ОТ ГО́СПОДА: АЛЛИЛУ́ИА, ГЛА́С 6: БЛА́ЖЕ́Н РАЗУМЕВА́ЯЙ НА НИ́ЩА И УБО́ГА, В ДЕ́НЬ ЛЮ́Т ИЗБА́ВИТ ЕГО́ ГОСПО́ДЬ. СТИ́Х: ВРАЗИ́ МОИ́ РЕ́ША МНЕ́ ЗЛАЯ: КОГДА́ У́МРЕТ И ПОГИ́БНЕТ И́МЯ ЕГО́? СТИ́Х: ЯДЫ́Й ХЛЕ́БЫ МОЯ, ВОЗВЕЛИ́ЧИ НА МЯ́ ЗАПИНА́НИЕ. ЕВА́НГЕЛИЕ ОТ МАТФЕ́А, ЗАЧА́ЛО 107: РЕЧЕ́ ГОСПО́ДЬ СВОИМ УЧЕНИ́КО́М: ВЕ́СТЕ, Я́КО ПО ДВОЮ́ ДНЮ ПА́СХА БУ́ДЕТ: И ПО ЧИ́НУ БО́ЖЕ́СТВЕННАЯ ЛИТУРГИ́А ВЕЛИ́КАГО ВАСИ́ЛИА. ВМЕ́СТО ЖЕ ХЕРУВИ́МСКИЯ ПЕ́СНИ ПОЕ́М ТРОПА́РЬ СЕ́Й, НА ГЛА́С 6, ТРИ́ЖДЫ. ВЕ́ЧЕРИ ТВОЕЯ́ ТА́ЙНЫЯ ДНЕ́СЬ, СЫ́НЕ БО́ЖИЙ, ПРИЧА́СТНИКА МЯ́ ПРИИМИ́: НЕ БО́ ВРАГО́М ТВОИМ ТА́ЙНУ ПОВЕ́М, НИ ЛОБЗА́НИЯ ТИ́ ДА́М Я́КО ИУ́ДА, НО Я́КО РАЗБО́ЙНИК ИСПОВЕ́ДАЮ ТЯ́: ПОМЯНИ́ МЯ ГО́СПОДИ ВО ЦА́РСТВИИ ТВОЕ́М. ТО́ЙЖЕ И ПРИЧА́СТЕН, И ВМЕ́СТО, ДА ИСПО́ЛНЯТСЯ УСТА́ НАША ТО́ЙЖЕ ПОЕ́М МНО́ЖИЦЕЮ, ДО́НДЕЖЕ ПРИЧАСТЯ́ТСЯ БРА́ТИЯ БО́ЖЕ́СТВЕННЫХ ТАИН. ПО ЗААМВО́ННОЙ ЖЕ МОЛИ́ТВЕ БЫВА́ЕТ УМОВЕ́НИЕ, И ЕГО́ ПОСЛЕ́ДОВАНИЕ, Я́КОЖЕ ЯВЛЯ́ЕТ УСТА́В. ТА́ЖЕ ДАЕ́ТСЯ АНТИ́ДОР, И ОТПУ́СТ. НА ТРАПЕ́ЗЕ ЖЕ ПРИЧАЩА́ЕМСЯ ВИНА́ И ЕЛЕ́А.